An Pinakadakulang Tawo na Nabuhay Kasuarin Pa Man

Kapitulo 34: Pagpili sa Saiyang mga Apostol

MGA saro may kabangang taon na magpoon kan si Juan na Bautisador ipamidbid si Jesus bilang Kordero nin Dios asin kan ponan ni Jesus an saiyang ministeryo sa publiko. Kan panahon na idto, si Andres, Simon, Pedro, Juan, asin puwedeng si Santiago (an tugang ni Juan), siring man si Felipe asin Natanael (na inaapod man na Bartolome), nagin saiyang enot na mga disipulo. Pag-abot nin panahon, dakol na iba pa an uminiba sainda sa pagsunod ki Cristo.

Ngonyan andam na si Jesus na pilion an saiyang mga apostol. An mga ini an saiyang magigin dayupot na kairiba na tatawan nin espesyal na pagsasanay. Pero bago sinda pinili, si Jesus nagduman sa sarong bukid asin ginamit an bilog na banggi sa pagpamibi, na posibleng naghahagad nin kadonongan asin pagbendisyon nin Dios. Kan aga na, inapod nia an saiyang mga disipulo asin sa sainda nagpili sia nin 12. Alagad, huling sinda nagpadagos bilang mga tinotokdoan ni Jesus, sinda inaapod pa man giraray na mga disipulo.

An anom na pinili ni Jesus, na nginaranan sa enotan, iyo an mga naenot niang disipulo. Si Mateo, na inapod ni Jesus hale sa saiyang binubuhisan, napili man. An lima pang pinili iyo si Judas (na inaapod man na Tadeo), Judas Iscariote, Simon na Cananita, Tomas, asin Santiago na aki ni Alfeo. An Santiago na ini inaapod man na Santiago na Sadang, tibaad magsalang huli sa pagigin sadit sa pisikal na tindog o mas ngohod sa edad kisa sa saro pang apostol na si Santiago.

Sa ngonyan an 12 ini haloy-haloy nang nakaibaiba ni Jesus, asin bisto nia sindang marhay. An totoo, an nagkapira sa sainda mga paryentes man sana nia. Si Santiago asin an tugang kaining si Juan malinaw na mga pinsan ni Jesus. Asin posible na si Alfeo tugang ni Jose, an amaamaan ni Jesus. Kaya an aki ni Alfeo, si apostol Santiago, pinsan man ni Jesus.

Siyempre, si Jesus mayong problema sa pagrumdom sa mga ngaran kan saiyang mga apostol. Pero marurumdoman daw nindo an mga iyan? Bueno, rumdomon sana nindo na igwa nin duwa na an ngaran Simon, duwa na an ngaran Santiago, asin duwa na an ngaran Judas, asin na si Simon igwang tugang na Andres, asin na si Santiago igwang tugang na Juan. Iyan an liyabe na marumdoman an walong apostol. Kabale sa apat na iba pa an sarong parasingil nin buhis (si Mateo), saro na kan huri nagduda (si Tomas), saro na inapod hale sa sirong nin kahoy (si Natanael), asin an saiyang katood na si Felipe.

An onse sa mga apostol taga-Galilea, an ginikanan na teritoryo ni Jesus. Si Natanael hale sa Cana. Si Felipe, Pedro, asin Andres kan enot taga-Betsaida, si Pedro asin Andres kan huri nagbalyo sa Capernaum, na garo baga duman nag-istar si Mateo. Si Santiago asin Juan nasa negosyo nin pagsisira asin posible man na nag-istar sa o harani sa Capernaum. Minalataw na si Judas Iscariote, na kan huri nagpasaloib ki Jesus, iyo an solamenteng apostol na taga-Judea. Marcos 3:​13-19; Lucas 6:​12-16.

▪ Sairisay na apostol an puwedeng mga paryentes ni Jesus?

▪ Sairisay an mga apostol ni Jesus, asin paano nindo marurumdoman an saindang ngaran?

▪ Hale saen na mga teritoryo an mga apostol?

(Ipagpapadagos sa masunod na luwas.)