Bareta kan mga Parabalangibog kan Kahadean
“Sarong Girumdoman sa Espiritu nin Kooperasyon”
HARANI sa pinakaporo kan timog nin España nakatindog an sarong dakulang puting gapo na inaapod na Gapo nin Gibraltar. Sa laog nin ginatos na taon, an gapong ini nagin sarong silensiong patotoo sa politikal na kontrobersiya asin internasyonal na dai pagkaoroyon. Sa kabaliktaran, an Gapo nin Gibraltar dai pa sana nahaloy iyo an nasa likod kan pagpaheling nin kooperasyon asin pagkasararo na bihirang maheling sa kinaban ngonyan.
Tolo sanang kilometro hale sa Gapo yaon an banwaan nin La Línea, España. Duman an pagtogdok nin sarong Kingdom Hall kan mga Saksi ni Jehova pinagsararo an ginatos na boluntaryong trabahador na galagang magkontribuwir kan saindang panahon asin kosog. Mantang nagpapagal sinda sa pagtindog nin sarong angay na lugar para sa pagsamba sa Kaglalang, si Jehova Dios, maski an kahangahangang nasa likod kan Gapo nin Gibraltar nawaran nin importansia kun ikokomparar sa ginigibong proyekto.
An mga parabalangibog kan Kahadean sa parteng iyan kan kinaban ipinadara an minasunod na bareta:
“Nuebe sientos na entusiastikong boluntaryo an nagtrabaho nin beinte-kuwatro oras, poon kan Biyernes na hapon, Setyembre 24, 1993. Kan alas siete nin Domingong banggi, ikinapatindog na an sarong bagong karatula na nagpapamidbid sa edipisyo bilang Kingdom Hall kan mga Saksi ni Jehova, asin an magayon na bagong estruktura ginagamit na sa kaenot-enoteng pampublikong pagtiripon dian.
“Dakol na Saksi hale sa haraning Gibraltar an nagbalyo sa linderos tanganing tabangan an saindang mga tugang na Kastila. ‘An politikal na pagkabaranga dai nakapaluya sa espiritu kan satong internasyonal na asosasyon nin magturugang,’ an paliwanag kan saro sa boluntaryong mga trabahador, sarong propiong taga-Gibraltar. Idinugang pa nia: ‘Nagkapirang taon na an nakaagi, an mga katood hale sa La Línea nag-abot tanganing tabangan kami na itogdok an samong Kingdom Hall sa Gibraltar, kaya ngonyan maogma kami na balosan an kabootan.’
“Tanganing madagdagan an boluntaryong mga paghihingoa kan duwang kongregasyon kan mga Saksi ni Jehova asin kan ginatos na ekspertong katabang hale sa rehiyon nin Andalusia, nagdesisyon an siudad nin La Línea na idonar an kinakaipuhan na lote. ‘Nakaugalean na, an lokal na mga autoridad na Kastila perming nagtatao nin lote para sa pagtogdok nin mga simbahan nin Katoliko,’ an paliwanag kan alkalde sa La Línea durante nin pagsongko sa lugar na tinotogdokan. ‘Taano ta dai man gibohon iyan sa ibang relihiyosong mga denominasyon? Hanga akong marhay sa pagkadaing kapasloan kan mga boluntaryo, asin namamatean kong maninigo sindang tawan kan samong suporta. Kaipuhan niato an mas dakol pa kan klaseng ini nin espiritu sa barangang kinaban ngonyan.’
“Sinasambit nia an Kingdom Hall bilang ‘sarong girumdoman sa espiritu nin kooperasyon.’ Tunay nanggad, an pinakakahangahangang kabtang bakong an disenyo nin arkitektura ni an kadakulaan kan edipisyo. Imbes, an nakapahanga sa dakol sa komunidad iyo an katunayan na iyan itinogdok gabos nin mga boluntaryo asin itinindog sa laog sana nin 48 oras!”
Malinaw na an mga Saksi ni Jehova sa La Línea asin sa nakapalibot na mga lugar dian nagpapatunay na maimbod sa mga tataramon sa Galacia 6:10. Dian si apostol Pablo nagsadol sa mga kapagtubod: “Tunay nanggad, kun siring, mantang igwa kita nin marahayrahay na panahon para kaiyan, gumibo kita nin marahay sa gabos, alagad orog na sa mga may relasyon sa sato sa pagtubod.”