Mga Inskripsion na May Espesyal na Kahulogan
“IEHOVA SIT TIBI CUSTOS”
AN MGA tataramon na ini na iinukit sa atubangan na lanob nin sarong ika-17 siglong harong sa Celerina, sirangan na Switzerland, nangangahulogan “si Jehova an magin paraprotehir nindo.” Sa mabukid na lugar na ini, bakong pambihira na maheling an ngaran nin Dios na iinukit o ipininta sa mga siglo na an edad na mga harong, simbahan, asin rektorya. Paano nagin bantog na marhay an ngaran na Jehova?
An suanoy na Rhaetia (na binibilog kan mga kabtang kan ngonyan timog-sirangan na Alemania, Austria, asin sirangan na Switzerland) nagin probinsia nin Roma kan 15 B.C.E. An mga tagaduman nakanood na magtaram nin Romansh, sarong basado sa Latin na lenguahe na tuminalubo sa nagkapirang dialekto na itinataram pa sa pirang kababan kan Alpine sa Switzerland asin norteng Italia.
Pag-abot nin panahon, an mga kabtang kan Biblia trinadusir sa Romansh. An sarong edisyon, an Biblia Pitschna, igwa kan Salmo asin kan Kristianong Griegong Kasuratan. Sa Bibliang ini, na ipinublikar kan 1666, an ngaran na Iehova naglataw nin dakol na beses sa bilog na Salmo. Mantang an Biblia an pangenot na materyal na binabasa sa harong, an mga parabasa kan Biblia Pitschna nagin pamilyar sa ngaran kan Kaglalang.
Alagad, an suminunod na mga kapag-arakian nawaran nin interes sa mga bagay sa Biblia. Dakol an dai napahirong maghapot kun ano an boot sabihon kan terminong “Iehova,” ni na an klero guminibo nin ano man na paghihingoa na ipaliwanag iyan. Kaya, an mga inskripsion na ini nagin mga dekorasyon sana na karakteristiko nin sarong nakalihis na panahon.
Sa dai pa sana nahahaloy na mga dekada nangyari an sarong pambihirang pag-edukar giraray. An mga Saksi ni Jehova nakaabot na sa mga kaplanodohan, na nagbabakasyon sa magagayon na kababan na ini asin nangorognang hinihingoa na tokdoan an mga tagaduman dapit sa Dios na an ngaran Jehova. May mga Saksi na nag-istar pa ngani sa lugar tanganing makagamit sinda nin mas dakol pang panahon sa pagtaram sa mga tawo manongod sa makangangalas na mga katuyohan kan Kaglalang para sa daga asin sa tawo. Kun siring, an antigong mga inskripsion na ini na Romansh nagkakaigwa nin bagong kahulogan mantang nakakanood an mga tawo dapit sa tunay na Dios, si Jehova.
[Mga ritrato sa pahina 32]
IEHOVA PORTIO MEA: Si Jehova an sakong kabtang.—Helingon an Salmo 119:57