An Pinakadakulang Tawo na Nabuhay Kasuarin Pa Man

Kapitulo 37: Hinale ni Jesus an Pagmondo nin Sarong Balo

PAKATAPOS tolos na paomayan an surogoon kan opisyal sa hukbo, si Jesus naghale paduman sa Nain, sarong siudad na labing 32 kilometros sa timog-solnopan nin Capernaum. An saiyang mga disipulo asin an sarong dakulang kadaklan uminiba saiya. Posibleng magbabanggi na kan dumatong sinda sa may palaog sa Nain. Digdi may nasabat sindang prosesyon sa lobong. An bangkay nin sarong barobata ilinuluwas sa siudad tanganing ilobong.

An situwasyon kan ina nangorognang makamomondo, huling sia balo asin ini an saiyang solong aki. Kan magadan an saiyang agom, nararanga sia kan bagay na yaon pa saiya an saiyang aki. An saiyang mga paglaom, kamawotan, asin ambisyon nasesentro sa ngapit kan aki. Pero ngonyan mayo nang magraranga. Dakula an saiyang kamondoan mantang an mga tawo sa banwaan iniibanan sia pasiring sa lugar na lolobongan.

Kan maheling ni Jesus an babae, an saiyang puso napahiro kan labi-labing kamondoan kaini. Kaya may kabootan, pero may karigonan na nagtatao nin kompiansa, sia nagsabi saiya: “Ontok na sa pagtangis.” An saiyang paagi asin hiro nakaapod sa atension kan kadaklan. Kaya kan sia rumani asin dootan an andas na kinamumugtakan kan bangkay na binubuligan, nagporondo an mga nagbuburulig. Gabos siertong naghohorophorop kun ano an gigibohon nia.

Totoo na an kairiba ni Jesus naheling na sia na milagrosong nagpapaomay sa dakol na tawong may mga helang. Pero malinaw na nungka ninda siang naheling na nagbangon nin siisay man hale sa mga gadan. Kaya daw niang gibohon an siring na bagay? Kinakaolay an bangkay, si Jesus nagboot: “Barobata, ako nagsasabi sa saimo, Bangon!” Asin an lalaki nagbuhat! Nagpoon siang magtaram, asin itinao sia ni Jesus sa saiyang ina.

Kan maheling kan mga tawo na an barobata totoong buhay, sinda nagpoon na magsabi: “Sarong dakulang propeta an pinatindog sa tahaw niato.” An iba nagsabi: “An Dios nagtao kan saiyang atension sa saiyang banwaan.” Tolos-tolos na an bareta manongod kaining makangangalas na gibo nakalakop sa bilog na Judea asin sa bilog na palibot kan kadagaan.

Si Juan na Bautisador nasa bilanggoan pa sagkod ngonyan, asin boot siang makaaram nin dakol pa manongod sa mga nagigibo ni Jesus. An mga disipulo ni Juan isinabi saiya an manongod sa mga milagrong ini. Ano an saiyang reaksion? Lucas 7:​11-18.

▪ Ano an nangyayari kan nagdadangadang si Jesus sa Nain?

▪ Paano naapektaran si Jesus kan saiyang naheling, asin ano an saiyang ginibo?

▪ Ano an reaksion kan mga tawo sa milagro ni Jesus?