An Pinakadakulang Tawo na Nabuhay Kasuarin Pa Man
Kapitulo 45: Sarong Dai Linalaoman na Magin Disipulo
MAKATATAKOT nanggad an tanawon kan umabot na si Jesus sa baybayon! Duwang pambihira karingis na lalaki an nagluwas hale sa haraning sementeryo asin nagdalagan pasabat sa saiya. Sinasaniban sinda nin mga demonyo. Huling an saro sainda posibleng mas maringis kisa sa saro asin mas haloy nang nagtitios sa pamomogol nin demonyo, saiya nakasentro an atension.
Haloy nang panahon na an makaheherak na lalaking ini nabubuhay na huba sa mga lolobngan. Padagos, aldaw asin banggi, nagkukurahaw sia asin linulugad nia nin gapo an saiyang sadiri. Maringison sia kaya mayo nin nagkokosog nin boot na umagi sa dalan na iyan. May mga pagprobar nang ginibo tanganing gaposon sia, pero pinuputol nia an mga kadena asin pinapatod an mga batbat sa saiyang bitis. Mayo nin siisay man an may kosog na pogolon sia.
Mantang paparani ki Jesus an lalaki asin naghuruhod sa saiyang pamitisan, pinakurahaw sia kan mga demonyo na nagpopogol saiya: “Anong labot ko saimo, Jesus, Aki kan Kaharohalangkaweng Dios? Ibinubugtak taka sa irarom nin panumpa sa Dios na dai ako pagpasakitan.”
“Lumuwas ka sa tawo, ika na marompot na espiritu,” an padagos na pinagsasabi ni Jesus. Pero naghapot si Jesus: “Ano an ngaran mo?”
“An ngaran ko Lehiyon, huli ta dakol kami,” an simbag. An mga demonyo naoogmang paghelingon an pagsakit kan mga nasasaniban ninda, na malinaw na nawiwili sa paggugrupo sa sainda sa may katalawan na espiritu nin pagsururog. Pero kan makahampang ni Jesus, nakimaherak sinda na dai isobol sa bungaw. Maheheling giraray niato na si Jesus igwa nin dakulang kapangyarihan; kaya niang daogon minsan an maringis na mga demonyo. Ini naghahayag man na an mga demonyo nakakaisi na an pagholog sainda sa bungaw kaiba kan saindang poon, si Satanas na Diablo, iyo an pantapos na paghokom sainda nin Dios.
Sarong aripompon nin mga 2,000 na orig an nagsasabsab sa harani sa bukid. Kaya an mga demonyo nagsabi: “Isobol mo kami sa mga orig, tanganing makalaog kami sainda.” Malinaw na an mga demonyo nakakamate nin bakong natural, sadistang kaogmahan sa paglaog sa mga hawak nin mga linalang na may laman. Kan togotan sinda ni Jesus na lumaog sa mga orig, sinda gabos na 2,000 nagdurulag pasiring sa ampas asin nagkaralamos sa dagat.
Kan maheling ini kan mga nag-aataman sa mga orig, naghidale sinda tanganing ibareta sa siudad asin sa nakapalibot na mga lugar an nangyari. Huli kaiyan, nagruluwas an mga tawo tanganing helingon an nangyari. Pag-abot ninda, naheling ninda an lalaking linuwasan kan mga demonyo. Tara, nagugubingan na sia asin toltol na an isip, nagtutukaw sa pamitisan ni Jesus!
An mga nakaheling nagsaysay kun paano naulian an lalaki. Iinestorya man ninda sa mga tawo an pambihirang pagkagadan kan mga orig. Kan madangog ini kan mga tawo, grabe an saindang pagkatakot, asin maigot nindang sinadol si Jesus na humale sa saindang teritoryo. Kaya nagsunod sia asin naglunad sa sakayan. An dating sinasaniban nin demonyo nakimaherak ki Jesus na togotan siang umiba. Pero sinabihan sia ni Jesus: “Pumuli ka sa saimong mga paryentes, asin ibareta mo sainda an gabos na bagay na ginibo saimo ni Jehova asin an pagkaherak nia sa saimo.”
Parateng pinagbobotan ni Jesus an mga pinaomayan nia na dai magsabi sa kiisay man, huling habo nia na an mga tawo magkonklusyon basado sa sobradong mga bareta. Pero angay an pagpuwerang ini huli ta an dating sinasaniban nin demonyo magpapatotoo sa mga tawo na ngonyan posibleng dai na magkakaoportunidad na aboton ni Jesus. Saro pa, an presensia kan tawo magtatao nin patotoo manongod sa kapangyarihan ni Jesus na gumibo nin marahay, na tinutumang an ano man na salang bareta na tibaad ipalakop dapit sa pagkagadan kan mga orig.
Sa pagsunod sa instruksion ni Jesus, an dating sinasaniban nin demonyo naghale. Pinonan niang ipahayag sa bilog na Decapolis an gabos na bagay na ginibo saiya ni Jesus, asin an mga tawo nagngaralas na marhay. Mateo 8:28-34; Marcos 5:1-20; Lucas 8:26-39; Kapahayagan 20:1-3.
▪ Taano, tibaad, ta isinentro an atension sa saro na sinasaniban nin demonyo mantang duwa an yaon duman?
▪ Ano an nagpapaheling na an mga demonyo nakaaaram manongod sa maabot na pagholog sa bungaw?
▪ Taano ta, garo baga, an mga demonyo gustong saniban an mga tawo asin hayop?
▪ Taano si Jesus ta naggibo nin pagpuwera sa dating sinasaniban nin demonyo, asin pinagbotan siang isabi sa iba an manongod sa ginibo Nia sa saiya?