‘An Saiyang mga Ginibo Kasunod Nia’
ALAS 8:50 n.a. kan Huwebes, Hulyo 28, 1994, natapos ni George D. Gangas an saiyang daganon na buhay. Nobenta y otso anyos sia. Saro sa mga linahidan, si George D. Gangas nagin miembro kan Namamahalang Grupo kan mga Saksi ni Jehova poon kan Oktubre 15, 1971.
An gabos na personal na nakakamidbid ki Tugang na Gangas nakakaaram kan saiyang pagkamoot sa katanosan asin pagkaongis sa karatan. Nagigirumdoman nindang marhay an paagi na inoorootro nia an pagladawan ki Satanas bilang sarong grabe, labi-labi karaot, maraot, maraoton, asin makababaldeng putikon. Sa kabaliktaran, nagtaram sia manongod ki Jehova bilang sarong mamomoton, maboot, madinamayon, mapagmahal, asin mapagmakolog na Ama. Dakol man an nakakagirumdom sa saiyang pagkawiling maghapot nin mga hapot sa Biblia. Sa ano man na pag-orolay, siertong maatubang sia nin mga hapot—an nagkapira sa mga iyan simple, an nagkapira sa mga iyan mas depisil. Iyo nanggad, namomotan nia an katotoohan sa Biblia.
Nabautismohan si Tugang na Gangas kan Hulyo 15, 1921. Pinonan nia an saiyang karera sa pambilog na panahon na ministeryo nin paghuhulit (pagpapayunir) kan Marso 1928. Kaya, nasa pambilog na panahon na paglilingkod sia sa total na 66 na taon. Nagin siang miembro kan mga tawohan sa prinsipal na opisina kan Watch Tower Bible and Tract Society sa Brooklyn kan Oktubre 31, 1928.
An estorya kan saiyang buhay mababasa sa Oktubre 15, 1966 na luwas kan The Watchtower. Iyan naglaladawan nin sarong tunay na espirituwal na tawo nin Dios. Sa artikulong iyan, makaoogma sa pusong ipinahayag nia an minasunod: “Namomotan ko an buhay asin boot ko na magkamit nin buhay an sakong mga tugang. Ibinibilang ko, kaiba ni apostol Pablo, na an gabos na bagay ‘kapierdihan huli sa daing kaagid na halaga kan kaaraman manongod ki Cristo Jesus.’”—Filipos 3:8.
Ipinaheling ni Tugang na Gangas paagi sa saiyang mga hiro na tunay nanggad na namotan nia an buhay, asin galaga niang ihiniras sa iba an saiyang “kaaraman manongod ki Cristo Jesus.” Kapupungawan sia, alagad kanigoan an satuyang kagayagayahan na inako na nia ngonyan an saiyang langitnon na balos! Ngonyan, ‘mapahingalo na sia sa saiyang pagpapagal, huli ta an saiyang mga ginibo kasunod nia.’—Kapahayagan 14:13, New International Version.
[Mga ritrato sa pahina 31]