An Pinakadakulang Tawo na Nabuhay Kasuarin Pa Man

Kapitulo 82: Si Jesus Nagpasiring Giraray sa Jerusalem

DAI nahaloy si Jesus nasa tinampo na naman, na nagtotokdo sa mga siudad asin baryo. Malinaw na sia nasa distrito nin Perea, na katampad kan Judea sa ibong kan Salog nin Jordan. Pero an saiyang destinasyon Jerusalem.

An Judiong pilosopiya na limitado sanang bilang an maliligtas an posibleng nagtulod sa sarong tawo na maghapot: “Kagurangnan, an mga maliligtas daw pipira sana?” Paagi sa saiyang simbag, pinirit ni Jesus an mga tawo na mag-isip kun ano an kaipuhan para sa kaligtasan: “Maghingoa kamo nin maigot [an boot sabihon, magpumirit, o magtios] na makalaog sa piot na tata.”

Apurado an siring na maigot na paghihingoa “huli ta,” an pagpadagos ni Jesus, “dakol an magmamawot na makalaog alagad dai makakahimo.” Taano ta dai sinda makakahimo? Ipinaliwanag nia na ‘kun an kagharong nagbuhat na asin pinintoan na an tata asin an mga tawo magtindog sa luwas asin magtoktok, na nagsasabi, “Ginoo, bukasi kami,” sia masabi: “Dai ko aram kun mga tagasaen kamo. Humarayo kamo sa sako, kamo gabos na paragibo nin karatan!”’

An mga nasirradohan sa luwas malinaw na nagdatong sa oras na kumbenyente sana para sa saindang sadiri. Pero sa panahon na iyan an pinto nin oportunidad sirrado asin natrangkahan na. Tanganing makalaog, maninigo kutana sindang nagdatong nin mas amay, minsan ngani tibaad sa panahon na iyan bakong kumbenyente na gibohon iyan. Iyo nanggad, mamondong kaaabtan an naghahalat sa mga idinidigson na gibohon na saindang pangenot na katuyohan sa buhay an pagsamba ki Jehova!

An mga Judio na sainda isinugo na maglingkod si Jesus nasudya, sa kadaklan na kabtang, na aprobetsaran an saindang makangangalas na oportunidad na akoon an probisyon nin Dios para sa kaligtasan. Kaya si Jesus nagsabi na sinda magtatarangis asin magrararagot an saindang mga ngipon kun sinda iapon na sa luwas. Sa ibong na kampi, an mga tawo hale sa “sirangan na mga lugar asin sa solnopan, asin hale sa amihanan asin timog,” iyo, hale sa gabos na nasyon, “masarandig sa lamesa sa kahadean nin Dios.”

Nagpadagos si Jesus: “Igwa nin mga huri [an ikinaoongis na mga bakong Judio, siring man an mga hinahamak na mga Judio] na magigin enot, asin igwa nin mga enot [an mga Judiong may kaya sa materyal asin biyaya sa relihiyon] na magigin huri.” An saindang pagigin huri nangangahulogan na an siring na mga hugakon, ingrato dai nanggad mapapaduman sa Kahadean nin Dios.

An mga Fariseo nagrani ngonyan ki Jesus asin nagsabi: “Lumuwas ka asin humale ka digdi, huli ta boot ni Herodes [Antipas] na gadanon ka.” Posibleng si Herodes mismo an nagpoon kan huringhuding na ini tanganing padulagon si Jesus sa teritoryo. Tibaad natakot si Herodes na mapalabot sa kagadanan nin saro pang propeta nin Dios siring kan nangyari saiya sa paggadan ki Juan na Bautisador. Pero sinabihan ni Jesus an mga Fariseo: “Lakaw asin sabihi an amid na iyan, ‘Uya! ako nagpapaluwas nin mga demonyo asin naggigibo nin pagpaomay ngonyan asin sa aga, asin sa ikatolong aldaw matatapos na ako.’”

Pakatapos kan saiyang gibohon duman, ipinadagos ni Jesus an saiyang pagbiyahe pasiring sa Jerusalem huli ta, siring kan paliwanag nia, “dai itinotogot na an sarong propeta malaglag sa luwas nin Jerusalem.” Taano ta dapat laoman na si Jesus gagadanon sa Jerusalem? Huling an Jerusalem iyo an kabiserang siudad, kun saen namumugtak an 71-miembrong halangkaw na korte nin Sanhedrin asin kun saen idinodolot an mga atang na hayop. Kun siring, dai itotogot na “an Kordero nin Dios” gadanon minsan saen kundi sa Jerusalem.

“Jerusalem, Jerusalem, an paragadan kan mga propeta asin paragapo kan mga isinugo sa saiya,” an panambitan ni Jesus, “makapirang binoot kong tiriponon an saimong mga aki na siring sa gunakan na tinitipon an saiyang mga siyo sa irarom nin saiyang mga pakpak, alagad hinaboan nindo iyan! Uya! An saindong harong pinabayaan na sa saindo.” Huli sa pagsikwal sa Aki nin Dios, an nasyon napahamak!

Mantang nagpapadagos si Jesus pasiring sa Jerusalem, inimbitaran sia sa harong nin sarong poon kan mga Fariseo. Sabbath kaidto, asin an mga tawo maingat na nagmamasid sa saiya, huling yaon duman an sarong tawo na may bago, natitipon an tubig posibleng sa saiyang mga takyag asin tabay. Kinakaolay ni Jesus an mga Fariseo asin an mga eksperto sa Pagboot na yaon duman, na an hapot: “Sono daw sa katogonan na magbolong sa sabbath o bako?”

Mayo nin naggirong. Kaya pinaomayan ni Jesus an tawo asin pinahale sia. Dangan naghapot sia: “Siisay saindo an, kun an saiyang aki o baka maholog sa bobon, dai tolos mahawas sa saiya sa aldaw nin sabbath?” Sa giraray, mayo nin siisay man na naggirong sa pagsimbag. Lucas 13:22–14:6; Juan 1:29.

▪ Ano an ipinaheling ni Jesus na kaipuhan para sa kaligtasan, asin taano ta dakol an nasirradohan sa luwas?

▪ Sairisay an mga “huri” na nagin enot, asin an mga “enot” na nagin huri?

▪ Ano an posibleng dahelan na sinabi na boot na gadanon ni Herodes si Jesus?

▪ Taano ta dai itotogot na an sarong propeta laglagon sa luwas kan Jerusalem?