“Siring sa mga Aldaw nin Kahoy”

LABING tolong ribong taon na an nakaagi, nagsurat si Moises: “An mga aldaw nin samong mga taon pitong polong taon; asin kun huli sa espesyal na kakosogan iyan walong polong taon, alagad an saindang pagdadanay nasa kasakitan asin makolog na mga bagay.”​—Salmo 90:10.

Sa ibong kan mga pag-oswag sa medisina, an lawig kan buhay nin tawo pareho pa man giraray kaidtong aldaw ni Moises. Alagad, dai perming kokondenaron an mga tawo sa siring kadaling pag-eksister. Sa libro sa Biblia na Isaias, nagsabi an Dios: “Siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili.”​—Isaias 65:22.

An saro sa pinakahalawig an buhay na kahoy sa kadagaan kan Biblia iyo an kahoy na olibo. An kahoy na nakaretrato digdi saro sa dakol na sangribong taon na an edad na kahoy na olibo na buhay pa sa Galilea. Noarin mabubuhay nin siring kalawig an mga tawo? Ipinaliliwanag kan iyo man sanang hula na iyan mangyayari kun lalangon na nin Dios an “bagong kalangitan asin sarong bagong daga.”​—Isaias 65:17.

Ihinuhula man kan libro nin Kapahayagan an pag-establisar nin “bagong langit asin bagong daga”​—sarong bagong langitnon na gobyerno asin sarong bagong sosyedad nin tawo na sa panahon na iyan an Dios ‘papahidon an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.’​—Kapahayagan 21:1, 4.

An panuga na ini nin Dios madali nang otobon. Sa panahon na iyan, maski an mga aldaw kan kahoy na olibo magigin garo na sana siring sa 24-oras na aldaw. Asin magkakaigwa kita nin bastanteng panahon na mag-ogma nin lubos sa gibo kan satong mga kamot.