An Pinakadakulang Tawo na Nabuhay Kasuarin Pa Man

Kapitulo 110: Natapos an Ministeryo sa Templo

Ultimong pagpaheling na ini ni Jesus sa templo. Sa katunayan, tinatapos na nia an saiyang ministeryo sa publiko digdi sa daga apuwera kan mga mangyayari sa pagbista asin paggadan sa saiya, na tolong aldaw pa. Ngonyan ipinagpadagos nia an saiyang makuring pagsagwe sa mga eskriba asin Fariseo.

Tolong beses pa niang ikinagsing: “Herak man sa saindo, mga eskriba asin Fariseo, mga parasaginsagin!” Enot, nagpahayag sia nin kasakitan para sa sainda huli ta linilinigan ninda “an luwas kan kopa asin kan pinggan, alagad sa laog iyan parano nin pananamsam asin pagpalabilabi.” Kaya sia nagsadol: “Linigan mo nguna an laog kan kopa asin kan pinggan, tanganing an luwas kaiyan magin malinig man.”

Sunod, nagpahayag sia nin kasakitan para sa mga eskriba asin Fariseo huli sa panlaog na karatan asin kalapaan na pinoprobaran nindang itago paagi sa panluwas na kabanalan. “Kamo kabaing nin mga lolobngan na pinaputi,” an sabi nia, “na sa luwas magayonon na paghelingon alagad sa laog pano kan mga tolang nin mga gadan asin nin gabos na klaseng karigsokan.”

Sa katapustapusi, nahayag an saindang pagsaginsagin sa saindang pagigin andam na gumibo nin mga lolobngan para sa mga propeta asin sinasamnohan iyan tanganing makaakit nin atension sa saindang sadiring mga gibo nin pagkamoot sa kapwa. Pero, siring sa ihinayag ni Jesus, sinda “mga aki kan mga guminadan sa mga propeta.” Iyo nanggad, namemeligro an siisay man na nangangahas na ihayag an saindang pagsaginsagin!

Sa pagpadagos, itinaram ni Jesus an saiyang pinakamakosog na mga tataramon nin pagdenunsiar. “Mga halas, aki nin mga rimoranon,” an sabi nia, “paano kamo makalilikay sa silot nin Gehenna?” An Gehenna iyo an kababan na ginagamit na basurahan sa Jerusalem. Kaya si Jesus nagsasabi na huli sa pagpadagos sa saindang maraot na dalan, an mga eskriba asin Fariseo maagi sa daing katapusan na kalaglagan.

Manongod sa mga isinugo nia bilang saiyang mga representante, si Jesus nagsabi: “An iba sa sainda saindong gagadanon asin ipapako, asin an iba sa sainda saindong hahampakon sa saindong mga sinagoga asin paglalamagon sa siudad-siudad; tanganing mamugtak sa saindo an gabos na matanos na dugo na pinabolos sa daga, poon sa dugo kan matanos na si Abel sagkod sa dugo ni Zacarias na aking lalaki ni Baraquias [na inaapod Joiada sa Ikaduwang Cronica], na saindong ginadan sa pag-oltanan kan santuaryo asin kan altar. Sa katotoohan sinasabi ko sa saindo, An gabos na bagay na ini madatong sa kapag-arakian na ini.”

Huling sinagwe ni Zacarias an mga namomoon sa Israel, “nagpasaloib sinda tumang sa saiya asin ginapo sia sa pagboot kan hade sa patyo kan harong ni Jehova.” Alagad, siring kan ihinula ni Jesus, magbabayad an Israel sa gabos na pinabolos na matanos na dugong iyan. Sinda nagbayad pakalihis nin 37 taon, kan 70 C.E., kan an Jerusalem linaglag kan mga hukbo nin Roma asin labing sarong milyon na Judio an nagadan.

Mantang pinaghohorophorop ni Jesus an makatatakot na situwasyon na ini, sia napurisaw. “Jerusalem, Jerusalem,” an ipinahayag nia giraray, “makapirang binoot kong tiriponon an saimong mga aki, siring kan gunakan na minatipon kan saiyang mga siwo sa irarom kan saiyang mga pakpak! Alagad ta kamo huminabo kaiyan. Uya! An saindong harong pinabayaan na sa saindo.”

Dangan idinagdag ni Jesus: “Magpoon ngonyan dai na kamo sa ano man na paagi makakaheling sa sako sagkod na kamo magsabi, ‘Omawon an minadatong sa ngaran ni Jehova!’” An aldaw na iyan mangyayari sa presensia ni Cristo pagtukaw nia sa saiyang langitnon na Kahadean asin an mga tawo maheheling sia paagi sa mga mata nin pagtubod.

Nagduman ngonyan si Jesus sa sarong lugar kun saen mamamasdan nia an mga kaha nin kayamanan sa templo asin an mga kadaklan na naghuhurulog dian nin kuwarta. An mga mayaman naghuhurulog nin dakol na sinsilyo. Alagad an sarong dukhang balo nagrani asin naghulog nin duwang sadit na sinsilyo na kakadikit kan halaga.

Pinadolok sa saiya an saiyang mga disipulo, si Jesus nagsabi: “Sa katotoohan sinasabi ko sa saindo na an dukhang balong ini nagbugtak nin labi kisa gabos na nagbugtak nin kuwarta sa mga kaha.” Siertong nagngalas sinda kun paano ini nangyari. Kaya nagpaliwanag si Jesus: “Sinda gabos nagbugtak gikan sa saindang kalabihan, alagad sia, gikan sa saiyang kadaihan, nagbugtak kan gabos na yaon sa saiya, an saiyang bilog na pagbuhay.” Pakasabiha kan mga bagay na ini, naghale si Jesus sa templo sa kahurihurihi.

Naghahanga sa kadakulaan asin kagayonan kan templo, an saiyang mga disipulo nagkagsing: “Paratokdo, helinga! kun anong klaseng mga gapo asin kun anong klaseng mga edipisyo!” Iyo nanggad, an mga gapo sinasabing labing 11 metros an laba, labing 5 metros an lakbang, asin labing 3 metros an langkaw!

“Naheheling mo an darakulang edipisyong ini?” an simbag ni Jesus. “Daing matatada digding gapo sa ibabaw nin gapo na dai gagabaon.”

Pakasabiha kan mga bagay na ini, si Jesus asin an saiyang mga disipulo nangaragi sa Kababan nin Cedron asin nagturukad sa Bukid nin mga Olibo. Hale duman puwede nindang tanawon an magayonon na templo. Mateo 23:25–24:3; Marcos 12:41–13:3; Lucas 21:1-6; 2 Cronica 24:​20-22.

▪ Ano an ginibo ni Jesus durante kan saiyang ultimong pagsongko sa templo?

▪ Paano nahayag an pagsaginsagin kan mga eskriba asin Fariseo?

▪ Ano an boot sabihon kan “silot nin Gehenna”?

▪ Taano ta sinabi ni Jesus na an balo nagkontribuwir nin labi kisa mga mayaman?

(Ipagpapadagos sa masunod na luwas.)