An Pinakadakulang Tawo na Nabuhay Kasuarin Pa Man

Kapitulo 113: Kapakumbabaan sa Ultimong Paskua

Si Pedro asin Juan, na isinugo ni Jesus, nag-abot na sa Jerusalem tanganing gumibo nin mga pag-andam para sa Paskua. Si Jesus, na malinaw na kaiba an sampulo pang apostol, nag-abot nin mas hapon na. An aldaw pasolnop na mantang si Jesus asin an saiyang kairiba naghihilig sa Bukid nin mga Olibo. Ini an ultimong pagtanaw ni Jesus sa siudad hale sa bukid na ini mantang aldaw pa sagkod kan saiyang pagkabuhay liwat.

Dai nahaloy si Jesus asin an saiyang kairiba nagdatong sa siudad asin nagpasiring sa harong na pagseselebraran ninda kan Paskua. Sinakat ninda an hagyanan pasiring sa dakulang kuwarto sa itaas, kun saen nanompongan nindang andam na an gabos para sa saindang pribadong pagselebrar kan Paskua. Inantisipar ni Jesus an okasyon na ini, siring kan sabi nia: “Minawot kong gayo na kakanon an paskuang ini kaiba nindo bago ako magtios.”

Nakaugalean nang apat na kopa nin arak an iniinom kan mga partisipante sa Paskua. Pakaakoa kan malinaw na ikatolong kopa, si Jesus nagpasalamat asin nagsabi: “Kuana nindo ini asin iabot nindo sa lambang saro sa saindo; huli ta ako nagsasabi saindo, Magpoon ngonyan dai na ako liwat mainom sa bunga kan poon nin ubas sagkod na dumatong an kahadean nin Dios.”

Mantang nagkakarakan, si Jesus nagbuhat, iginilid an saiyang pan-ibabaw na gubing, nagkua nin tuwalya, asin pinalisan nin tubig an sarong palanggana. Sa parate, sinisierto nin kagharong na nahanawan an mga bitis nin sarong bisita. Alagad huling sa okasyon na ini mayo nin kagharong na presente, inasikaso ni Jesus an personal na paglilingkod na ini. An siisay man sa mga apostol puwede kutanang inaprobetsaran an oportunidad na gibohon ini; pero, malinaw na huling igwa pa sinda nin pagririribal, mayo ni saro na naggibo kaiyan. Ngonyan napasopog sinda kan ponan ni Jesus na hanawan an saindang mga bitis.

Pagdolok saiya ni Jesus, si Pedro nagkontra: “Siertong dai mo noarin man hahanawan an sakong mga bitis.”

“Kun dai taka hanawan, mayo ka nin kabtang sa sako,” an sabi ni Jesus.

“Kagurangnan,” an simbag ni Pedro, “bako sanang an mga bitis ko, kundi siring man an sakong mga kamot asin an sakong payo.”

“An nagkarigos na,” an simbag ni Jesus, “dai na kaipuhan na hanawan apuwera sa saiyang mga bitis, kundi biyo nang malinig. Asin kamo malinig na, alagad bakong gabos.” Sinabi nia ini huli ta aram nia na si Judas Iscariote nagpaplanong pasaloiban sia.

Pakahanawe ni Jesus kan mga bitis kan gabos na 12, kabale an mga bitis kan mapasaloib sa saiya, si Judas, isinulot nia an saiyang pan-ibabaw na gubing asin nagsandig liwat sa lamesa. Dangan sia naghapot: “Aram nindo kun ano an ginibo ko sa saindo? Inaapod nindo akong ‘Paratokdo,’ asin, ‘Kagurangnan,’ asin tama kamo, huli ta siring man nanggad ako kaiyan. Kun siring, kun ako, minsan Paratokdo asin Kagurangnan, naghanaw kan saindong mga bitis, maninigo na hanawan man nindo an bitis kan lambang saro. Huli ta ako nagtao sa saindo nin arogan, tanganing, kun ano an ginibo ko sa saindo, iyo man an gibohon nindo. Sa katotoohan sinasabi ko sa saindo, An oripon dai maorog sa saiyang kagurangnan, ni na an sarong isinugo orog sa saro na nagsugo sa saiya. Kun aram nindo an mga bagay na ini, maogma kamo kun gibohon nindo iyan.”

Kanigoan kagayon na leksion sa mapakumbabang paglilingkod! An mga apostol dai maninigong naghahanap kan enot na lugar, na nag-iisip na sinda importanteng marhay kaya an iba maninigong perming maglingkod sa sainda. Kaipuhan nindang sunodon an arogan na itinao ni Jesus. Bako ining sarong rituwal na paghanaw nin bitis. Dai, kundi ini pagigin andam na maglingkod na mayo nin pagpalaenlaen, gurano man kamenus o kabakong magayon kan trabaho. Mateo 26:​20, 21; Marcos 14:​17, 18; Lucas 22:​14-18; 7:44; Juan 13:​1-17.

▪ Ano an pambihira manongod sa pagtanaw ni Jesus sa Jerusalem mantang palaog sia sa siudad tanganing selebraron an Paskua?

▪ Durante kan Paskua, malinaw na arin na kopa an iinabot ni Jesus sa 12 apostol pakapamibi?

▪ Anong personal na paglilingkod an nakaugalean nang itinatao sa mga bisita kan si Jesus uya digdi sa daga, asin taano ta dai iyan itinao durante kan Paskua na sinelebrar ni Jesus asin kan mga apostol?

▪ Ano an katuyohan ni Jesus sa paggibo kan menus na paglilingkod na paghanaw sa mga bitis kan saiyang mga apostol?