An Pinakadakulang Tawo na Nabuhay Kasuarin Pa Man

Kapitulo 115: Puminutok an Sarong Pagpasuruhay

Amay kan banggi, si Jesus nagtokdo nin sarong magayon na leksion dapit sa mapakumbabang paglilingkod paagi sa paghanaw sa mga bitis kan saiyang mga apostol. Pakatapos kaiyan, iinintrodusir nia an Memorial kan saiyang nagdadangadang na kagadanan. Ngonyan, nangorogna huli kan nangyari pa sana, may nakabibiglang nangyari. An saiyang mga apostol napalabot sa sarong mainit na pagpasuruhay manongod sa kun siisay sa sainda an garo baga pinakadakula! Malinaw na ini kabtang nin nagpapadagos na iriwal.

Girumdomon na pakatapos na magliwat an lalauogon ni Jesus sa bukid, an mga apostol nagpasuruhay manongod sa kun siisay sa sainda an pinakadakula. Saro pa, si Santiago asin Juan naghagad nin prominenteng mga posisyon sa Kahadean, na nagbunga nin orog pang iriwal sa tahaw kan mga apostol. Ngonyan, sa saiyang ultimong banggi sa kaibanan ninda, siertong namondo si Jesus na maheling sindang nagdidiriskutiran na naman! Ano an ginibo nia?

Imbes na anggotan an mga apostol huli sa saindang iginawe, sa giraray si Jesus mapasensiang nangatanosan sa sainda: “An mga hade kan mga nasyon nagpapakang kagurangnan ninda, asin an mga igwa nin kapangyarihan sa sainda inaapod na mga Mapagbiyaya. Alagad kamo dai magigin siring. . . . Huli ta siisay an orog na dakula, an saro na nagsasandig sa lamesa o an sarong naglilingkod? Bako daw na an nagsasandig sa lamesa?” Dangan, pinagigirumdom sinda dapit sa saiyang halimbawa, sia nagsabi: “Alagad ako nasa tanga nindo bilang an sarong naglilingkod.”

Sa ibong kan saindang mga pagkabakong sangkap, an mga apostol nakidamay ki Jesus durante kan mga pagbalo sa saiya. Kaya sia nagsabi: “Ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean.” An personal na tipanan na ini sa pag-oltanan ni Jesus asin kan saiyang maimbod na mga parasunod isinasaro sinda sa saiya tanganing magkaigwa nin kabtang sa saiyang makahadeng pagsakop. Solamente sarong limitadong bilang na 144,000 an sa katapustapusi pinalalaog sa tipan na ini para sa sarong Kahadean.

Minsan ngani an mga apostol inalokan kan makangangalas na paglaom na ini na makaiba ni Cristo sa pamamahala sa Kahadean, sinda sa presente maluya sa espirituwal. “Kamo gabos masisingkog mapadapit sa sako sa bangging ini,” an sabi ni Jesus. Alagad, sa pagsabi ki Pedro na Sia namibi para sa saiya, si Jesus nagsadol: “Kun makabalik ka na, pakosoga an saimong mga tugang.”

“Saradit na aki,” an paliwanag ni Jesus, “ako nasa kaibahan nindo sa kadikit na sanang panahon. Hahanapon nindo ako; asin siring kan sinabi ko sa mga Judio, ‘Sa dudumanan ko dai kamo makakaduman,’ sinasabi ko man sa saindo ngonyan. Tinatawan ko kamo nin bagong togon, na kamo magkaminorootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo, kun kamo nagkakaminorootmootan.”

“Kagurangnan, saen ka maduman?” an hapot ni Pedro.

“Sa dudumanan ko dai ka makakasunod sako ngonyan,” an simbag ni Jesus, “alagad masunod ka pakatapos.”

“Kagurangnan, taano ta dai ako makakasunod saimo ngonyan?” an boot maaraman ni Pedro. “Itatao ko an sakong kalag para sa saimo.”

“Itatao mo daw an saimong kalag para sa sako?” an hapot ni Jesus. “Sa katotoohan ako nagsasabi saimo, Ika ngonyan, iyo, sa bangging ini, bago magturaok an manok nin makaduwa, minsan ika mapainda sako nin makatolo.”

“Maski pa kun ako kaipuhan na magadan sa kaibanan mo,” an pagkontra ni Pedro, “dai ko nanggad ika papaindahan.” Asin mantang an ibang apostol nakibale sa pagsabi kan iyo man sanang bagay, si Pedro naghambog: “Minsan an gabos na iba pa magkasiringkog mapadapit sa saimo, dai ako noarin man masisingkog!”

Pinanonongdan an panahon na isinugo nia an mga apostol sa paghuhulit sa Galilea na mayo nin supot asin takupis, si Jesus naghapot: “Dai kamo nagkulang nin ano man, bako daw?”

“Dai!” an simbag ninda.

“Alagad ngonyan an may supot darahon iyan, siring man an takupis,” an sabi nia, “asin an mayong minasbad ipabakal an saiyang pan-ibabaw na gubing asin bumakal. Huli ta ako nagsasabi saindo na ining nasusurat kaipuhan na maotob sa sako, arin na baga, ‘Asin sia ibinilang sa kaibanan nin mga tampalasan.’ Huli ta an napapadapit sa sako naootob.”

Itinotokdo ni Jesus an panahon na sia ipapako sa kaibanan nin mga paragibo nin maraot, o mga tampalasan. Ipinaririsa man nia na an saiyang mga parasunod mapapaatubang sa makuring paglamag pakatapos kaiyan. “Kagurangnan, uya! uni an duwang minasbad,” an sabi ninda.

“Igo na iyan,” an simbag nia. Siring sa maheheling niato, an pagkaigwa ninda kan mga minasbad sa dai mahahaloy magpapangyari ki Jesus na magtokdo nin saro pang mahalagang leksion. Mateo 26:​31-35; Marcos 14:​27-31; Lucas 22:​24-38; Juan 13:​31-38; Kapahayagan 14:​1-3.

▪ Taano ta nakabibiglang gayo an pagpasuruhay kan mga apostol?

▪ Paano hinusay ni Jesus an pagpasuruhay?

▪ Ano an nagibo kan pakipagtipan ni Jesus sa saiyang mga disipulo?

▪ Anong bagong togon an itinao ni Jesus, asin gurano iyan kaimportante?

▪ Anong sobrang pagtitiwala an ipinaheling ni Pedro, asin ano an sinabi ni Jesus?

▪ Taano an mga pagboot ni Jesus manongod sa pagdara nin supot asin takupis ta napapalaen sa mga pagboot na itinao nia bago kaini?

(Ipagpapadagos sa masunod na luwas.)