‘Kun Paanong an Batbat Minapatarom sa Batbat’
SA PAGHINANAPOS kan ikatolong siglo C.E., an sarong maigot na hoben na lalaki na an ngaran Antonio, na sinasabing sarong “Kristianong Koptiko,” suminuhay sa kinaban asin 20 taon na nagsolosolo sa disyerto. Taano? Hinona nia na ini an pinakamarahay na paagi na mapaglingkodan nia an Dios. Sia an enot na maimpluwensiang ermitanyo, o eremita, nin Kakristianohan.
Ngonyan, kakadikit na sana an ermitanyo nin Kakristianohan. Alagad nagdadakol an mga indibiduwal na gustong magsolosolo sa saro pang paagi. Habo nindang makipag-olay sa iba manongod sa relihion, na naghohona na an siring na orolay nagbubunga nin mga dai pagkaoroyon asin iriwal. An saindang pagsamba sa pangenot iyo an dai pagkolog sa saindang kataed.
Totoo, an dai pagkolog sa kataed nin saro kabtang nin tunay na relihion, alagad labi pa an kaipuhan. An sarong suanoy na talinhaga nagsasabi: “Sa batbat, an batbat mismo minatarom. Kaya an tawo minapatarom sa lalauogon nin ibang tawo.” (Talinhaga 27:17) An totoo, dinadagka kan Biblia an mga Kristiano na magtiripontipon, bako na biyong isuhay an saindang sadiri sa kinaban o sa ibang Kristiano. (Juan 17:14, 15) Iyan nagsasabi: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon.” (Hebreo 10:24, 25) Sinusunod kan Mga Saksi ni Jehova an hatol na iyan. Nagkapirang beses kada semana, sinda nagtitiripon tanganing ‘magpatinararoman nin lalauogon,’ na pinakokosog an pagtubod nin mga kapagtubod. Nanonompongan ninda na an sadiosan na pag-orolay sa Biblia dai nagbubunga nin iriwal. Imbes, iyan nagbubunga nin pagkaoroyon asin katoninongan. Iyan mahalagang kabtang nin tunay na pagsamba.