Mga Saksi ni Jehova sa Bilog na Kinaban—New Zealand
PUEDE daw na an mga isla mag-omaw ki Jehova? Iyo, sono sa Isaias 42:10: “Awit kamo ki Jehova nin bagong awit, nin saiyang kaomawan magpoon sa kaporoporohi kan daga, . . . kamong mga isla asin kamong mga nag-eerok dian.” An mga isla na minabilog sa New Zealand tunay na nag-oomaw ki Jehova. Bantog sa kinaban huli sa mga danaw, palaog na mga parte nin dagat na nasa pag-oltanan nin mga ampas, haralangkaw na bukid, glesyer, baybayon, mapakong kadlagan, asin berdeng mga lugar sa probinsia, an New Zealand malinaw na nagtataram dapit sa kamahalan asin kamurawayan kan Kaglalang nin langit asin daga.
Poon kan kapinonan pa sana kan siglong ini, an nagdadakol na mga taga-New Zealand idinagdag an saindang tingog sa pag-omaw ki Jehova paagi sa pagdolok sa saiya sa dalisay na pagsamba asin paghiras sa iba kan maogmang bareta kan Kahadean nin Dios. Dai pa sana nahahaloy, an sarong Saksi na nakabareta nin maogmang eksperyensia manongod sa pagpapatotoo sa mga paryente nagdesisyon na maghingoang magpatotoo sa saiyang pamilya. Rinegalohan nia nin mga kopya kan librong Puwede Kamong Mabuhay Sagkod Lamang sa Paraiso Digdi sa Daga an nagkapirang miembro kan pamilya. An nagin mga resulta sagkod ngonyan? Ibinareta nia na sarong tugang na babae asin sarong tugang na lalaki an nag-aadal na ngonyan sa Biblia, sarong sobrino an nabautismohan na bilang saro sa Mga Saksi ni Jehova, asin an iba mas nag-aako na ngonyan kan katotoohan kan Tataramon nin Dios. Dakula pa an oma na tatrabawohon nia; apuera sa saiyang mga magurang, anom an saiyang tugang na lalaki asin siyam an tugang na babae!
Nagbubunga man nin kaomawan ki Jehova kun an mga Saksi nagtitinarabangan sa pagtogdok nin mga Kingdom Hall. Halimbawa, an kolumnista sa diaryo na si Roy Perkins nagsurat sa Opotiki News kan Mayo 17, 1994: “Bilang daing pagtubod, naghanga akong marhay sa mga trabaho asin paghihingoa kan gabos na dusay na trabahador na nagdusay nin dakulang gayong panahon asin paghihingoa sa proyekto huli sa pagkamoot sa saindang Dios.
“Sa gabos na ining oras nin trabaho na ginamit sa Sabado asin Domingo nungka akong nakaheling o nakadangog nin iriwal nin unyon . . . An mga babae nasa itaas kan andamyo na nagtatrabaho kaiba kan mga lalaki, na nagmamasilya, nagbubuhat, nag-aalsa, na gabos pamugtak an boot asin maogma.
“Asin mayo ni sarong minuto na nawara huli sa pagsigarilyo. Para sa gabos na tawong idto na nagtatrabaho sa ano man na linya an aire puro asin malinig apuera sa mga sangaw nin pinta asin alpog nin adobe.”
Nagsurat an grupo nin kamagurangan sa Kongregasyon nin Opotiki: “An bilog na proyekto hinangaan na marhay kan banwaan. Garo baga an gabos nag-oorolay manongod kaiyan. Nagkapirang pag-adal sa Biblia an naponan. An sarong partikularmenteng nakaoogmang marhay para sa samo iyo an sarong relihiosong marhay na mag-agom na sa laog nin dakol na taon nakiolay na dai kami magsongko sa sainda. Nagduman sinda sa lugar kan konstruksion kada aldaw dangan sa pagtiripon. An agom na lalaki nagsabi pakatapos kaidto, ‘Naheheling ko na kamo an banwaan nin Dios. Sa boot ko, minawot ko sa bilog kong buhay na makiasosyar sa sarong banwaan na arog kaini.’”
Kan nakaaging taon, an sarong kolumnista sa Otago Daily Times nagsabi kan minasunod manongod sa marikas na itinogdok na Kingdom Hall sa Dunedin: “Iyan sarong pambihirang gibo, sarong pambihirang halimbawa nin motibasyon asin pagtabang sa sadiri.” An diaryo man sanang iyan nagkomento: “An mga tagasiudad nagheling na may paghanga mantang sarong dakulang edipisyo an itinotogdok sa atubangan kan saindang mga mata, asin dakol an siertong nagpepensar kun ano pang ibang paghirahay asin positibong mga proyekto an puedeng mahaman kun may kaparehong dakulang grupo nin boluntaryong mga trabahador asin kadakol na mapagkooperar na espiritu. An Kingdom Hall sarong may pag-orgolyong simbolo nin nakararahay na paghihingoa na may nakakamtan na mga resulta.”
Sa ginatos na nagbisita sa lugar kan konstruksion, sarong lalaki an nagkomento na an mga Saksi nagtotogdok nin “mga simbahan” mantang an saiyang relihiosong denominasyon nagpapabakal kaiyan huli sa nagdidikit na miembro. “Kun naghalat kamo nin mga dose pang bulan, nabakal kutana nindo an saro kan samong mga simbahan,” an may pag-alangan niang sabi. “Kaipuhan niamong magpabakal nin simbahan huli ta dai mi kaya an mga binabayadan. Alagad, siempre, kamo mayo nin binabayadan na klero. . . . Dangan an saindong mga edipisyo hababa an gastos sa mantension, bakong haralangkaw na edipisyo na may mga kampanaryo na imposibleng mamantenir.”
Malinaw na an mga isla puede nanggad na mag-omaw sa Dios. Padagos logod na mag-aniningal an mga pag-omaw ki Jehova sa magayon na dagang ini sa Pasipiko—asin sa bilog na kinaban!
[Kahon sa pahina 9]
SUMARYO KAN NASYON:
1994 Taon nin Paglilingkod
INAKAHALANGKAW NA BILANG NIN NAGPAPATOTOO: 12,867
KATIMBANG: 1 Saksi sa 271
NAG-ATENDER SA MEMORIAL: 24,436
PROMEDYONG MGA PARAHAYAG NA PAYUNIR: 1,386
PROMEDYONG MGA PAG-ADAL SA BIBLIA: 7,519
BILANG NIN NABAUTISMOHAN: 568
BILANG NIN MGA KONGREGASYON: 158
SANGANG OPISINA: MANUREWA
[Retrato sa pahina 9]
Mga payunir na pasiring sa langtad kaidtong mga 1930
[Retrato sa pahina 9]
Mga pasilidad kan sanga sa Manurewa
[Retrato sa pahina 9]
Paghuhulit kan mensahe kan Kahadean sa Devonport, Auckland