Pagtao—Linalaoman daw Iyan?
TIBAAD aram na gayo nindo na an mga pagregalo parateng idinidikta nin kostumbre. Sa kadaklan na kultura may mga okasyon na linalaoman an mga regalo. An siring na mga regalo puedeng bilang tanda nin paggalang o kapahayagan nin pagkamoot. An kadaklan kaiyan dai noarin man ginagamit kan rinegalohan; an iba nakatatabang na mapanigoan an tunay na mga pangangaipo asin odok na inaapresyar.
Sa Denmark pagkamundag nin sarong omboy, an mga katood asin paryente masongko asin madara nin mga regalo na linalaoman nindang mapakikinabangan kan omboy. Sa ibang kadagaan, an mga katood tibaad magpaparti na dian itinatao an siring na mga regalo bilang pag-antisipar sa pagkamundag.
Sa dakol na kamugtakan, an mga okasyon na linalaoman an mga regalo taonan na mga aktibidad. Minsan ngani an siring na mga selebrasyon bakong kaugalean sa tahaw kan enot na mga Kristiano, iyan nagin nang popular na marhay sa tahaw kapwa kan kadaklan na naghihingakong Kristiano asin kan mga bakong Kristiano. An kaugalean nin mga pagregalo sa kumpleanyo tibaad mawara sa ibang kultura mantang nagkakaedad an mga aki, alagad kabaliktaran an idinidikta nin kostumbre sa tahaw kan mga Griego. Sa Grecia tinatawan nin dakulang atension an mga kumpleanyo. Rineregalohan man ninda an saro sa saiyang “aldaw nin ngaran.” Ano iyan? Bueno, an relihiosong kostumbre may ikinokonektar na ibang “santo” sa kada aldaw kan taon, asin dakol na tawo an isinusunod an ngaran sa mga “santo.” Pag-abot kan aldaw kan “santo,” rineregalohan an mga kangaran kaiyan.
Dugang pa sa mga selebrasyon sa kumpleanyo para sa saindang mga aki, an mga Koreano igwa nin nasyonal na kapiestahan na inaapod na Aldaw nin mga Aki. Iyan panahon na nag-eeskursion an mga pamilya asin may irineregalo sa mga aki ano man an petsa kan saindang pagkamundag. An mga Koreano igwa man nin Aldaw nin mga Magurang, na an mga aki nagreregalo sa saindang mga magurang, asin Aldaw nin mga Maestro, na an mga estudyante nagtatao nin onra sa saindang mga maestro asin nagreregalo sa sainda. Sono sa kostumbre nin mga Koreano, pag-abot nin saro sa edad na 60, sarong dakulang parti an ginigibo. An pamilya asin mga katood iribahan sa pagpahayag nin mga kamawotan na logod lumawig pa an saiyang buhay asin sia magin maogma, asin rineregalohan an nakaabot na sa kamugtakan na iyan sa buhay.
An kasal saro pang okasyon na tibaad kaipuhan na magregalo huli sa popular na kostumbre. Kun may ikinakasal sa Kenya, an pamilya kan nobyo linalaoman na magregalo sa pamilya kan nobya. An mga bisita nagdadara man nin mga regalo. Kun susunodon kan bagong kasal an mga dikta nin kostumbre, sinda matukaw sa sarong plataporma, mantang itinatao kan mga bisita an saindang mga regalo. Mantang itinatao an kada regalo, ipapaisi na “Si Polano nagregalo sa mag-agom.” An dakol na nagregalo mauuyam na marhay kun dai sinda nakaako nin siring na pagmidbid.
Sa tahaw kan mga taga-Lebanon, kun may ikinakasal, an mga katood asin kataraed, pati mga tawo na dai man gayong midbid an mga ikinasal, minaarabot dakol na aldaw pakalihis kan kasal na may darang mga regalo. Poon sa pagkaaki, tinokdoan sinda na an mga pagregalo sarong paninimbagan, arog sa pagbayad nin utang. “Kun dai mo iyan gigibohon, bakong pamugtak an boot mo,” sabi nin sarong lalaking taga-Lebanon. “Iyan tradisyon.”
Minsan siring, sa gabos na okasyon na linalaoman an pagtao, sa dakol na kadagaan pangenot an Navidad. Bako daw na totoo iyan sa saindong lugar? Kaini pa sanang 1990, kinarkulo na an mga Amerikano taon-taon naggagasto nin labing $40 bilyones sa mga regalo kun Navidad. An kapiestahan na iyan malaad na sineselebrar man kan mga Budista asin Shintoista sa Hapon, asin manlaenlaen na porma kan selebrasyon an manonompongan sa Europa, Amerika del Sur, asin sa mga parte nin Aprika.
An Navidad panahon na an mga tawo naglalaom na magin maogma, alagad dakol an bakong maogma. Asin nanonompongan nin dakol na an may pagkatarantang pamamakal nin mga regalo asin an paghadit sa pagbayad kan mga utang nakatatahob sa ano man na mga kaalingan na naeeksperyensiahan ninda.
Pero, sinasabi kan Biblia na igwa nin kaogmahan sa pagtao. Igwa nanggad, depende sa espiritu nin pagtao.—Gibo 20:35.