An Kaso Tumang sa mga Saksi ni Jehova Dinesisyonan

PAKALIHIS nin paorootrong pagdigson, an Korte de Apelasyon sa Tesalonica, Grecia, sa katapustapusi nagtipon kan Hunyo 8, 1995, tanganing bistahon an kaso tumang sa apat na babaeng Saksi ni Jehova. An akusasyon tumang sainda? Proselitismo, na ipinangangalad kan Griegong ley sa labi nang limang dekada.

Minsan siring, sa panahon na an korte magtipon, an pangenot na testigo sa demanda​—an pading nagsutsut sa kaso tumang sa apat na babae—​gadan na. An saro pang padi nagprobar na tumestigo para sa saiya, alagad dai inako kan korte an saiyang testimonio. Sa siring, bakong makangangalas na an bista luminawig sana nin 15 minutos! Siniyasat kan hokom an iba pang testigo sa demanda asin nakua na an mga akusado dai nagkasala nin paggibo nin ipinagbabawal na proselitismo. Ipinaheheling kan desisyon na ini na an mga korte sa Grecia andam na igalang asin pangaptan an nagin desisyon kan 1993 kan Korte Para sa mga Diretso nin Tawo sa Europa.

Nangorognang makangangalas na maheling an tolong babae na nagtestigo sa demanda na duminolok sa akusadong mga Saksi, na bilog na pusong nagpelisitar sainda. “Kami naghahagad nin dispensasyon sa gabos na nangyaring ini,” an sabi kan saro sa sainda. Idinugang nia: “Iyan bako niamong sala. Pinirit kami kan padi na idemanda kamo. Ngonyan na gadan na sia, gusto niamo na kamo dumalaw sa samong baryo asin sa samong mga harong.”

Sa siring, si Jehova nagtao liwat nin kahangahangang kapangganahan sa saiyang banwaan sa Grecia. An ley sa proselitismo ipinasar sa Grecia kan 1938 asin 1939. Kan 1993 an Korte Para sa mga Diretso nin Tawo sa Europa nagdesisyon na an paggamit kan ley na ini tanganing idemanda an Mga Saksi ni Jehova sala.​—Helingon an The Watchtower, Setyembre 1, 1993, pahina 27-31.