Tunay na Katiwasayan—Sarong Pasohan na Masakit Makamtan
SI Arnold sarong aki na namomoot na marhay sa saiyang malomhok na munyikang tigre. Saen man sia magduman, guyod-guyod nia iyan—sa pagkawat, sa kakanan, sa saiyang katre. Para sa saiya, an tigre nagtatao nin karangahan, katiwasayan. Sarong aldaw, nagkakrisis. Nawawara an tigre!
Mantang naghihibi si Arnold, rinerekisa kan saiyang ina, ama, asin tolong matuang tugang na lalaki an saindang dakulang harong sa paghanap sa tigre. An saro sa sainda sa katapustapusi nakua iyan sa sarong sulong-sulong. Minalataw na ibinugtak iyan duman ni Arnold dangan nalingawan kun haen na iyan. Ibinalik an tigre, asin pinahid ni Arnold an saiyang mga luha. Maogma asin tiwasay na naman sia.
Marahayon nanggad kun an gabos na problema mareresolberan nin arog kaiyan kapasil—arog kasimple sa pakakua nin munyikang tigre sa sarong sulong-sulong! Minsan siring, para sa kadaklan na tawo mas seryoso asin komplikado kisa dian an mga isyu nin katiwasayan. Sa haros gabos na lugar, an mga tawo nag-iisip-isip, ‘Ako daw magigin biktima nin krimen o kadahasan? Namemeligro daw akong mawaran kan sakong trabaho? Segurado daw na magkakaigwa nin bastanteng pagkakan an sakong pamilya? Rarayoan daw ako nin iba huli sa sakong relihion o sa sakong pinaghalean na rasa?’
Dakulaon an bilang nin mga tawo na mayo nin katiwasayan. Sono sa Naciones Unidas, haros tolong bilyon an mayo bako sanang nin pagbolong sa ordinaryong mga helang kundi pati nin kinakaipuhan na mga bolong. Labing sarong bilyon katawo an matamlay huli sa makuring kadukhaan. An haros sarong bilyon, minsan kayang magtrabaho, kulang an trabaho. Nagdadakol an dulag. Sa katapusan nin 1994, mga 1 sa kada 115 katawo sa daga an napiritan na dumulag hale sa saindang harong. Minilyon na buhay an linalaglag kan $500-bilyones-kada-taon na negosyo sa droga na pinoponan nin dai mabilang na mga akto nin krimen asin kadahasan. Linalaglag nin guerra an buhay nin minilyon. Kaidto sanang 1993, 42 na nasyon an nagkaigwa nin darakulang guerra, mantang an 37 pa nakaeksperyensia nin politikal na kadahasan.
An guerra, kadukhaan, krimen, asin iba pang peligro sa katiwasayan nin tawo magkakakonektar, asin iyan nagdadakol. Mayo nin tigre-sa-sulong-sulong na mga solusyon sa siring na mga problema. An totoo, an mga iyan dai nanggad mareresolberan nin mga tawo.
“Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan,” an patanid kan Tataramon nin Dios, an Biblia. Kun siring, siisay an mapagtitiwalaan niato? Nagpapadagos an tekstong ini: “Maogma idtong an saiyang paratabang iyo an Dios ni Jacob, na an paglaom yaon ki Jehova na saiyang Dios, an Kaggibo kan langit asin daga, kan dagat, asin kan gabos na yaon dian.”—Salmo 146:3-6.
Taano ta mapagtitiwalaan niato si Jehova na magtao nin katiwasayan sa dagang ini? Posible daw na magkamit nin tiwasay, maogmang buhay ngonyan? Paano hahaleon nin Dios an mga kaolangan sa katiwasayan nin tawo?