Puede Kamong Magkaigwa kan “Puso kan Leon”

KUN beses ginagamit kan Biblia an leon bilang simbolo nin kapusoan asin kompiansa. An maisog o mapusong mga lalaki ilinaladawan na igwa kan “puso kan leon,” asin an mga matanos sinasabing “garo sadang na leon na tiwala.” (2 Samuel 17:10; Talinhaga 28:1) Nangorogna kun inaangat, ipinaheheling kan leon na angay iyan sa reputasyon bilang “an pinakamakosog sa mga hayop.”​—Talinhaga 30:30.

Sa kadaihan nin takot kan leon iinaagid ni Jehova Dios an saiyang determinasyon na protehiran an saiyang banwaan. An Isaias 31:​4, 5 nagsasabi: “Kun paanong an leon nagngangarob, minsan an may bunday na sadang na leon, sa biktima kaiyan, kun yaon an gabos na pastor na inapod tumang dian, asin apisar kan saindang tingog dai sia makukubhanan asin apisar kan saindang pagriribok dai sia maduko; siring man sana si Jehova nin mga hukbo mahilig tanganing makipaglaban nin huli sa Bukid nin Sion . . . Sa pagsorog sa saiya, sierto man na ililigtas nia sia. Sa pagligtas sa saiya, saiya man na papangyayarihon na sia makadulag.” Sa siring iginagarantiya ni Jehova sa saiyang mga lingkod an saiyang aktibong pag-ataman, partikularmente sa atubangan nin kasakitan.

Ikinokomparar kan Biblia an pinakadakulang kaiwal nin katawohan, si Satanas na Diablo, sa sarong nagngangarob, mabangis na leon. Tanganing makalikay na magin biktima nia, sinasabihan kita sa Kasuratan: “Magmata kamo, magpuka kamo.” (1 Pedro 5:8) An sarong paagi na magibo ini iyo na likayan an nakagagadan na pagtungka sa espirituwal. Sa bagay na ini si Jesus nagsabi: “Mag-ingat kamo sa saindo man sana na an saindong mga puso dai manganaan nin kapasloan asin nin kaburatan asin mga paghadit sa buhay.” (Lucas 21:​34-36) Iyo, an pagigin puka sa espirituwal sa “huring mga aldaw” na ini puedeng magtao sa sato kan “puso kan leon,” puso na ‘marigon, nananarig ki Jehova.’​—2 Timoteo 3:1; Salmo 112:​7, 8.