Sarong Magasin na Nakatataros sa Puso

DAI mabilang na magasin an ipinupublikar sa bilog na globo tanganing panigoan an pagkagutom kan nagbabasa para sa impormasyon o kaalingan.

Ano an minagibo sa kapot nindong magasin na pambihirang marhay? An minasunod na surat, na naresibi kan sangang opisina kan Watch Tower Society sa Alemania, tibaad makatao nin simbag:

“Salamat na marhay, namomotan na mga tugang, sa saindong mga paghihingoa asin trabaho. Kan an duwa kong aking lalaki asin ako magpuli hale sa pagtiripon, minsan ngani alas 9:30 na nin banggi, dai puedeng dai ako maghinanyog sa pinakabagong An Torrengbantayan [na nasa audiocassette sa Ingles]. Mantang naghuhugas ako kan mga plato, pinonan kong maghinanyog sa enot na artikulong pag-aadalan (Abril 1, 1995). Namatean ko na kaipuhan ko giraray na hinanyogon iyan, kaya pinondo ko an sakong trabaho sa kusina asin binasa an artikulo [“Mahalaga Kamo sa mga Mata nin Dios!”] sa An Torrengbantayan kasabay kan tape. Nataros kaiyan an sakong puso, nangorogna an ikaapat asin ikalimang parapo. Dangan nagpoon na bumolos an mga luha​—alagad bakong haloy. Nagpapasalamat ako ki Jehova na ako buhay asin kabilang sa saiyang banwaan asin, kaiba kan kadakol pang iba, ikapamimidbid ko an saiyang ngaran. Tunay nanggad na mayo nin dahelan na makamateng daing halaga. An espiritu ni Jehova yaon sa saiyang banwaan. Kita logod gabos makatagal asin tumindog nin marigon sa pagtubod, na nagkakasararo. May Kristianong kapadangatan, an saindong tugang na babae sa pagtubod.”

Labi pa sa impormasyon an itinatao kan An Torrengbantayan. Tinataros kaiyan an puso kan mga nagbabasa kaiyan asin pinaninigoan an saindang pagmawot para sa espirituwal na kakanon asin napapanahon na pamparigon sa boot. Iyo, An Torrengbantayan nagtatao nin “kakanon sa igong panahon.”​—Mateo 24:45.