Karangahan Durante nin Apat na Taon nin Guerra
DURANTE kan apat na taon nin guerra sa teritoryo kan dating Yugoslavia, dakol na tawo an nag-agi nin mga kasakitan asin grabeng kakulangan. Kabale sa sainda an ginatos na Saksi ni Jehova, na fiel na nagpadagos sa pagsamba sa “Dios nin gabos na karangahan.”—2 Corinto 1:3.
Sa Sarajevo, tinios kan mga tawo an dugang pang kasakitan nin pamumuhay sa sarong dakulang siudad na nasasalikopan sa bilog na panahon kan guerra. Yaon an mga kakulangan nin elektrisidad, tubig, pangatong, asin pagkakan. Paano nagpunsionar an Kongregasyon kan Mga Saksi ni Jehova sa Sarajevo sa irarom kan masakit na mga kamugtakan na ini? An mga Kristiano hale sa kataraed na kadagaan isinapeligro an saindang buhay na darahon an dakol na ayuda. (Helingon an The Watchtower, Nobyembre 1, 1994, pahina 23-7.) Siring man, an mga tugang sa Sarajevo ihiniras sa lambang saro kun ano an yaon sa sainda, na an pangenot na pagdodoon nasa paghiras nin espirituwal na mga bagay. Durante kan pagsalikop an sarong Kristianong paraataman hale sa siudad na iyan nagtao kan minasunod na report:
“Pinahahalagahan ming marhay an samong mga pagtiripon. Kami mag-agom, kaiba an 30 katawo pa, naglalakaw nin 15 kilometros [9 na milya] paduman sa mga pagtiripon. Kun beses iinaanunsio na an tubig isusuplay durante kan mga panahon na gigibohon an mga pagtiripon. Ano an gigibohon kan mga tugang? Magdadanay daw sinda sa harong o maatender sa mga pagtiripon? Mas ginusto kan satong mga tugang na umatender sa mga pagtiripon. An mga tugang perming nagtitinarabangan; ano man an yaon sa sainda, ihinihiras ninda. An sarong tugang na babae sa samong kongregasyon nag-eerok sa luwas kan siudad, harani sa kadlagan; kaya mas pasil nin kadikit para sa saiya na makakua nin pangatong. Nagtatrabaho man sia sa sarong panaderiya, asin harina an ibinabayad sa saiya. Kun posible, nagluluto sia nin dakulang tinapay asin dinadara iyan sa pagtiripon. Pakatapos kan pagtiripon, sa luwasan, tinatawan nia nin sarong pidaso an kada saro.
“Mahalaga na mayo ni saro sa mga tugang na lalaki o babae na nakamateng pinabayaan. Mayong nakaaaram kun siisay sa samo an sunod na mangangaipo nin tabang sa sarong maraot na situwasyon. Kan mayelo an tinampo sa samo asin may helang an sarong tugang na babae, an hoben, makosog na mga tugang na lalaki binubutong sia na sakay sa sarong paguyod pasiring sa mga pagtiripon.
“Kami gabos nakikikabtang sa paghuhulit, asin binendisyonan ni Jehova an samong mga paghihingoa. Naheling nia an samong masakit na situwasyon sa Bosnia, alagad binendisyonan nia kami nin pag-oswag—pag-oswag na dai mi naheling bago kan guerra.”
Siring man, sa iba pang parte kan dating Yugoslavia na rinaot nin guerra, an Mga Saksi ni Jehova nagkamit nin mga pag-oswag sa ibong nin grabeng mga kasakitan. Hale sa opisina kan Mga Saksi ni Jehova sa Croatia nag-abot an report na ini manongod sa sarong grupo nin mga Saksi: “Nasakitan na marhay sa saindang kamugtakan an mga tugang na nag-eerok sa Velika Kladuša. Nagkapirang beses na sinalakay an banwaan. Kinaipuhan na ipaliwanag kan mga tugang an saindang neutralidad sa mga Croata, Serbiano, asin manlaenlaen na hukbong Muslim. Totoo nanggad na kadakol kan dapat nindang tagalan—pagkabilanggo, panhahampak, gutom, peligro sa kagadanan. Pero, sinda gabos nagdanay na fiel asin may ekselenteng pribilehio na maheling an bendisyon ni Jehova sa saindang mga aktibidad.”
Sa ibong kan mga kasakitan na ini, an Mga Saksi ni Jehova sa Velika Kladuša asin kataed na Bihać padagos na nagkakamit nin mga pag-oswag mantang maigot nindang ihinihiras sa saindang kataraed an mensahe nin karangahan nin Dios. An total na 26 na parahayag kan Kahadean sa duwang lugar na ini nagkokondukta nin 39 pag-adal sa Biblia sa harong!