“Sarong Makangangalas na Regalo Gikan ki Jehova”

AN Mayo 1, 1996 na luwas kan An Torrengbantayan igwa nin hararom na paliwanag dapit sa Kristianong neutralidad asin kun paano gigibohon na timbang an satong mga paninimbagan ki Jehova asin ki “Cesar.” (Mateo 22:21) Dakol na kapahayagan nin pag-apresyar an nadangog para sa bagong itinaong impormasyon. Kabale dian an minasunod na surat, hale sa sarong Saksi sa Grecia asin nakaadres sa Namamahalang Grupo kan Mga Saksi ni Jehova:

“Boot kong ipahayag an sakong kairairaroming pasasalamat sa saindo gabos na namomotan na mga tugang huli sa siring na pag-ataman sa samo sa espirituwal. Mantang mga siyam na taon akong nabilanggo huli sa sakong Kristianong pagtubod, tunay na inaapresyar ko an makangangalas na mga ideya na nasa Mayo 1, 1996 na luwas kan An Torrengbantayan. (Isaias 2:4) Ini sarong makangangalas na regalo gikan ki Jehova.​—Santiago 1:17.

“Mantang binabasa ko an mga artikulong ini, nagirumdoman ko an komento sa sarong naenot na Torrengbantayan (Agosto 1, 1994, pahina 14): ‘Malinaw nanggad, an pagkamakatanosan sarong mahalagang marhay na kualidad, saro na nagpapahiro sa sato na kamotan nin orog pa si Jehova.’ Iyo, mga tugang, nagpapasalamat ako ki Jehova na ako kabtang kan saiyang maboot asin mamomoton na organisasyon, na malinaw na nagpapabanaag kan saiyang kadonongan.​—Santiago 3:17.

“Nagin marahay an pag-ako sa nadugangan na liwanag sa An Torrengbantayan na Mayo 1 digdi sa Grecia, nangorogna kaidtong mga nabilanggo nin nagkapirang taon o nasa bilanggoan pa sagkod ngonyan huli sa saindang pagtubod. Salamat giraray. Pakosogon logod kamo ni Jehova paagi sa saiyang espiritu na padagos na tumao sa samo nin mahalagang marhay na espirituwal na pagkakan sa maribok na mga panahon na ini.”