Bareta kan mga Parabalangibog kan Kahadean

Binalosan an Marigon na Paninindogan sa Eskuelahan

MAY hula an Biblia: “An gabos mong aki magigin mga tawong tinokdoan ni Jehova, asin an katoninongan kan saimong mga aki magigin abunda.” (Isaias 54:13) Sa ekstendidong paagi, an “gabos mong aki” puedeng iaplikar sa bilog na grupo nin mga lingkod nin Dios digdi sa daga, kabale an mga akion pa. Ngonyan, sinisierto nin Kristianong mga magurang na an saindang mga aki ‘tinotokdoan ni Jehova’ sa harong asin sa Kristianong mga pagtiripon.

Minsan siring, kun nasa eskuelahan an mga hoben na Kristiano napapaatubang sa masakit na mga angat. Parate nindang nanonompongan na kaipuhan na manindogan nin marigon basado sa saindang nanodan sa Biblia. Kun sinda naninindogan, an mga resulta puedeng magin kapakipakinabang para sa mga estudyante asin mga maestro man, siring sa ipinaheheling kan minasunod na eksperyensia hale sa Micronesia.

Sa sadit na isla nin Tol sa Chuuk Islands sa solnopan na Pasipiko, an mga maestro sa sarong lokal na eskuelahan sinabihan an gabos na aki na magpreparar para sa asin magpartisipar sa selebrasyon nin Pangangalag kan eskuelahan. Aram kan mga estudyanteng Saksi na puedeng kaiba sa selebrasyon an mga dekorasyon asin gubing na naglaladawan sa mga kalag, tianak, asin aswang​—na gabos may koneksion sa mga tradisyon na espiritistiko. An mga aking ini dai puedeng magpartisipar sono sa konsensia.a

Sa saindang basado sa Biblia na pagsasanay sa harong asin sa Kristianong kongregasyon, aram ninda na an siring na mga kaugalean dai nakapaoogma sa Dios, dawa kun ginigibo para sana sa kaalingan. Tanganing tumabang na ipaliwanag nin mas malinaw an saindang paninindogan, inimbitaran kan mga aki si Barak, saro sa mga misyonerong Saksi sa isla, tanganing makipag-olay sa saindang mga maestro.

Pakatapos na madangog an paliwanag, an mga maestro nag-areglo para sa sunod na miting, na dian si Barak puedeng magtaram sa atubangan kan gabos na maestro kan eskuelahan. Sa miting na ini, si Barak nag-atubang nin mga katunayan tanganing ipaheling an tunay na kahulogan kan Pangangalag. Kinua nia an saiyang impormasyon sa nagkapirang publikasyon kan Watch Tower pati sa iba pang mga reperensia. An mga maestro asin administrador napangalas sa saindang nanodan manongod sa pinaghalean, kasaysayan, asin relihiosong kahulogan kan selebrasyon. Pinagmarahay nindang magkaigwa nin miting kan gabos na maestro tanganing desisyonan kun paano reresolberan an situwasyon.

Pakalihis nin nagkapirang aldaw, iinanunsiar an dai linalaoman na desisyon. An gabos na preparasyon para sa Pangangalag kinakanselar. An eskuelahan dai na nanggad maselebrar kan Pangangalag sa taon na iyan. Kanigoan kapaborableng resulta huli sa determinasyon kan hoben na mga Saksing ini na gibohon an tama sa eskuelahan! An mga hoben dai noarin man kaipuhan na matakot o masopog na marigon na manindogan para sa katotoohan kan Biblia.

Sa bilog na kinaban, an mga Saksi ni Jehova tinotokdoan an saindang mga aki na magmahigos sa eskuelahan. An hoben na mga Saksi sinasanay man na mamuhay sono sa mga prinsipyo kan Biblia asin ihiras an saindang paglaom asin mga paniniwala sa ibang mga estudyante mientras na igwa sindang oportunidad. Dawa kun an mga resulta bakong paborable o marikas na arog kan sa kasong ini, an mga hoben puedeng magkaigwa kan kompiansa asin satispaksion na bunga kan paggibo kan tama. Asin orog na mahalaga, makaseseguro sinda na an saindang langitnon na Ama naoogma asin bebendisyonan sinda huli sa saindang fiel na pagkuyog.

[Nota sa Ibaba]