“Kaya Haen an Simbahan Nindo?”

AN MGA SAKSI NI JEHOVA sa Mozambique parateng hinahapot kaini. An totoo, sagkod sa dai pa sana nahahaloy iyan nagin hapot na depisil simbagon. Ini huli ta an Mga Saksi ni Jehova dai nagkamit nin legal na pagmidbid sa nasyon na ini sagkod kan 1991. Huli kaini, bakong posible na magkaigwa nin malinaw na mamimidbid asin establisadong mga lugar nin pagsamba.

Minsan siring, naliwat an situwasyon na iyan kan Pebrero 19, 1994. Kan mainit, masaldang na aldaw na idto, idinedikar an enot na duwang Kingdom Hall na itinogdok kasuarin man sa Mozambique. May total na 602 an nag-atender sa dedikasyon kan magayon na tiriponan na ini sa duungan na siudad nin Beira, na haros nasa tahaw kan kalabaan nin baybayon nin Mozambique. Iyan an mahipno sa mga pangangaipo kan tolong kongregasyon sa siudad na iyan.

An bilog na proyekto, poon sa pagbugtak kan pundasyon sagkod na mahaman an mga edipisyo, luminawig nin sarong taon asin duwang bulan nin mahigos na pagtrabaho. Sa parate 30 o labi pang boluntaryo hale sa kataed na Zimbabwe an minaabot asin magkaabagang nagtatrabaho kaiba kan lokal na mga Saksi. Huling dai sinda gabos magkakaigo sa erokan nin mga misyonero sa Beira, na nagserbing sentro kan mga trabaho, an nagkapira nagkampo sa palibot kan erokan durante nin mga katapusan nin semana asin sa nagkapirang okasyon sa laog nin dakol na semana.

An lugar kan Kingdom Hall para sa mga Kongregasyon nin Massamba asin Munhava yaon sa pangenot na tinampo nin Beira. “Sa sarong masibot na aldaw, na nagin marikas an trabaho asin risa nang marhay an nahahaman,” an naobserbaran nin sarong misyonero, “nakaheheling kami nin mga dikit nang maaksidente mantang an minaaging mga tsuper nagheheling sa Kingdom Hall, na haros nalilingawan na an saindang manibela.” Dakol an talagang minapondo tanganing helingon an trabaho, asin sinda partikularmenteng naghanga sa presensia nin laen-laen na rasa na iribang nagtatrabaho.

Dakulang pagplano asin pag-organisar an kalabot sa trabaho. Bakong arog kan dakol na ibang proyekto sa parteng ini kan kinaban, kun saen kulang an materyales asin mga pagkukuanan, an trabaho sa mga Kingdom Hall nungkang uminontok huli sa kakulangan nin mga suplay. Sa sarong pangyayari, 800 na sako nin semento an kaipuhan, asin an solamenteng lugar na makasusuplay kaiyan mayo kan kinakaipuhan na mga sako na lalagan kan semento. Kinontak kan mga tugang an sangang opisina kan Watch Tower Society sa kabisera, sa Maputo; ipinadara an mga sako paagi sa eroplano, dinara sa pabrika nin semento, asin linagan. An trabaho nagpadagos na daing poropondo.

Sa saro pang pangyayari, kan ikinakabit an mga sulay sa atop, an grupo kinulang nin aserong mga panalgan. Huli sa grabeng kakulangan, an asero para sa proyekto inimportar hale sa distansiang 600 kilometros! An sarong lalaki na nagheheling dinolok kan saro sa grupo asin hinapot kun may aram siang makukuanan ninda kan asero tanganing matapos an trabaho. An lalaki nagsimbag: “Labing sarong oras na akong nakatindog digdi, asin siertong dai ini nagkanorongod. Dai akong maginibo kundi hangaan an saindong trabaho asin an espiritu kan proyektong ini. Igwa ako kan asero na kaipuhan nindo, asin kaogmahan ko na itao iyan sa saindo bilang regalo.” Iyan nagin napapanahon na marhay na probisyon.

Dakol na nagmamasid an nag-isip-isip kun anong dakulang kompanya nin konstruksion an namamahala sa proyekto. An grupo, siempre, naogmang marhay sa pagsabi sa sainda na an mga ini Saksi ni Jehova na nagboboluntaryo kan saindang mga serbisyo. Ano an nangorognang nakatudok sa boot kan mga nagmamasid? “Kamo nagkakasararo,” an sabi nin saro. “Minsan ngani magkakalaen an rasa, kamo iribang nagtatrabaho bilang magturugang.” An resulta iyo na dakol an nagduman na naghahagad nin pag-adal sa Biblia. Nagkaigwa man iyan nin epekto sa mga pagtiripon. An promedyong bilang nin nag-aatender sa Kongregasyon nin Manga, halimbawa, labing doble sa bilang kan mga Saksi.

An bagong mga Kingdom Hall tunay nanggad na nagin dakulang bendisyon para sa lokal na mga Saksi. An kadaklan dati nagtitiripon sa mga lugar na gibo sa ordinaryong mga materyales na an atop mga doot o binabawan nin pirang mahimpis na lata, nasa likod nin harong, o sa sadit na kuarto nin sarong pribadong harong. Parate sindang nababasa kun minaoran; pero fiel sindang nag-aatender sa mga pagtiripon. Sa laog nin mga dekada ini an solamenteng “mga Kingdom Hall” na aram kan mga Saksi sa Mozambique. Si Tugang na Caetano Gabriel, sarong magurang sa Kongregasyon nin Massamba, nagpahayag: “Nagpapasalamat kami sa samong mga tugang sa bilog na kinaban na nagkontribwir sa pagkahaman kan proyektong ini.” An sarong hoben na Saksi nakagirumdom: “Kan yaon kami sa Carico (“mga kampo sa pag-edukar giraray” kun saen ilinalaog an mga Saksi ni Jehova sa laog nin mga 12 taon), permi kaming nagsasabi, ‘Magmamaigot kita nin fiel, asin babalosan kita ni Jehova.’ An bagong Kingdom Hall balos hale ki Jehova.” An saindang mga tataramon nagpapahayag kan saindang odok na pagtanaw nin utang na boot asin kan saindang determinasyon na omawon si Jehova.

An dakol na hoben na nakikabtang sa konstruksion napano kan espiritu nin pagpapayunir asin pakatapos kaiyan naglaog sa ministeryong regular payunir. An hoben na si Isabel, sarong regular payunir sa Kongregasyon nin Manga, nagkomento mantang hineheling nia an malinigon na Kingdom Hall kan aldaw bago iyan idedikar: “Para sa sako ini an pinakamagayon na lugar sa siudad nin Beira. Dakulaon na kaogmahan na ako yaon digdi.” Si Adão Costa, sarong misyonero, nagpaliwanag na an lokal na mga autoridad nakipagtabangan na marhay sa pagtogot nin espesyal na mga prosedimiento sa pag-importar huli ta midbid ninda an pagkasadiosan kan mga Saksi. Dangan idinagdag nia: “Minsan ngani pagal-pagal kami, kagayagayahan na maheling an mga bunga kan gabos na trabahong ini para sa onra asin kamurawayan ni Jehova.”

Ngonyan, kun an sarong makikatood na residente sa siudad nin Beira naghahapot, “Kaya haen an simbahan nindo?” an mga Saksi itinotokdo sia sa saro kan mga bagong Kingdom Hall asin minasimbag paagi sa mga tataramon na siring baga kan, “Yaon iyan sa International Road, Avenida Acordo de Lusaka, sa balyo mismo kan Fourth Squadron Police Station.” Dangan, idinadagdag an sarong pagkorehir, “Sanang bako iyan na simbahan. Iyan Kingdom Hall!”

[Mapa/Mga retrato sa pahina 20]

(Para sa aktuwal na format, helingon an publikasyon)

APRIKA

Mozambique

Beira

Maputo

[Pasasalamat para sa pinagkuanan]

Mapa: Mountain High Maps® Copyright © 1995 Digital Wisdom, Inc.