An mga Pakinabang sa Trangkilong Puso

HALOY nang aram nin modernong medikal na siensia na an dai pinopogolan na pagkaanggot igwa nin nakadadanyar na epekto sa hawak nin tawo. Kaidtong labing sanggatos na taon na an nakaagi, an The Journal of the American Medical Association (JAMA) nagsabi: “Sarong lalaki an nagadan sa pagputok nin grabeng kaanggotan, asin sinasabi na, tibaad, maluya an saiyang puso, na dai kayang tagalan an kolog na itinatao kan kamugtakan nin saiyang isip. Daing siisay man na nag-iisip na ini kulminasyon sana nin halawig na serye nin siring na mga pagputok nin grabeng kaanggotan, na iyo mismo an dahelan kan pagluya nin puso.”

An mga tataramon sa enotan dai pinagngalasan kan mga nag-aadal sa Tataramon nin Dios, an Biblia. Mga 29 siglo bago nagtaram an JAMA manongod sa mga peligro nin pagigin aranggoton, si Hadeng Salomon pinasabngan na sumurat: “An trangkilong puso iyo an buhay kan laman.” (Talinhaga 14:30) An mga tataramon na ini totoo pa sagkod ngonyan.

Paagi sa pagpapadanay nin trangkilong kaisipan, nakalilibre kita sa dakol na helang na sa parate konektado sa tension, arog baga nin paglangkaw nin presyon, mga kolog sa payo, asin mga problema sa paghangos. Minsan siring, apuera sa mas marahay na salud, mapaparahay an satong relasyon sa iba kun pagmamaigotan niato na “pabayaan an kaanggotan asin rumayo sa kabangisan.” (Salmo 37:8) An mga tawo tunay na nadagka ki Jesus huli sa saiyang mahoyong boot asin odok sa pusong pagmakolog sa sainda. (Marcos 6:​31-34) Siring man, kita magigin gikanan nin kaginhawahan para sa iba kun kita nagpapatalubo nin trangkilong puso.​—Mateo 11:​28-30.