Siisay an Dapat Basolon sa mga Guerra?
AN Dios daw an dapat basolon sa mga guerra na pinagralabanan nin katawohan? “Dai, an Dios habo nin guerra.” Siring kaiyan an pagkasimbag ni Martin Niemöller, sarong bantog na Protestanteng klerigo sa Alemania, sa hapot na ini dai nahaloy pagkatapos kan Guerra Mundial II. An saiyang mga komento ipinublikar kan 1946 sa librong inaapod na Ach Gott vom Himmel sieh darein—Sechs Predigten (O Dios, Dumungaw Ka sa Langit—Anom na Sermon).a An libro nagsasabi:
“An siisay man na gustong basolon an Dios sa [mga guerra] dai aram, o habong aramon, an Tataramon nin Dios. Siempre, iba nang hapot kun baga kitang mga Kristiano dapat o dai dapat na pangenot na basolon sa dai matapos-tapos na mga guerra. Asin bakong madali para sa sato na dulagan an hapot na ini. . . . Magigirumdoman man nin eksakto na an mga iglesiang Kristiano, sa bilog na nag-aging mga panahon, paorootrong nagboluntaryo sa pagbendisyon sa mga guerra, soldados, asin armas patin na ipinamibi ninda sa bako nanggad na Kristianong paagi an pagkalaglag kan saindang mga kaiwal sa guerra. An gabos na ini sala niato asin sala kan satong mga apoon, alagad bako nanggad na an Dios an dapat basolon. Asin kitang mga Kristiano sa ngonyan nasosopog sa atubangan nin saro daang sekta na arog kan Maigot na mga Estudyante sa Biblia [Mga Saksi ni Jehova], na an ginatos asin rinibo napaduman sa mga kampo de konsentrasyon asin nagadan [pa ngani] huli ta nagsayuma sindang maglingkod sa guerra asin habong mambadil nin mga tawo.”
Ngonyan, mga 50 taon pakalihis kan Guerra Mundial II, an mga tataramon ni Niemöller nagtatao nin sarong bagay na maninigong odok na pakaisipon kan mga tawong mamomoton sa katoninongan. Dai, bakong an Dios an dapat basolon sa pagpabolos nin dugo kan mga nasyon! Totoo nanggad, paagi sa saiyang tunay na mga parasamba, na dai nakikikabtang sa iriwal kan kinaban, ipinahahayag nin Dios an nagdadangadang nang katapusan nin gabos na guerra.—Salmo 46:9; Juan 17:16.
[Nota sa Ibaba]
a An mga sermon ni Martin Niemöller paghaloyhaloy ipinublikar sa Ingles sa librong Of Guilt and Hope. Minsan siring, an bersion sa Ingles laen sa orihinal na tekstong Aleman, huli kaini an kotasyon na ini trinadusir nin direkta hale sa Aleman.
[Pasasalamat para sa pinagkuanan kan retrato sa pahina 32]
Retrato na kua kan USAF