Bareta kan mga Parabalangibog kan Kahadean

Pagpaabot kan Katotoohan sa Gabos

SI APOSTOL Pablo sarong maigot na parabalangibog kan Kahadean nin Dios. Dai nia tinogotan an pagtumang na makaolang sa sugo sa saiya na ihulit an “maogmang bareta.” (1 Corinto 9:16; Gibo 13:​50-52) Sinadol ni Pablo an iba na sunodon an saiyang halimbawa.​—1 Corinto 11:1.

An Mga Saksi ni Jehova midbid sa bilog na kinaban huli sa saindang desididong mga paghihingoa na maghulit. An totoo, sinda nagtataram sa iba kapwa sa “marahay na panahon” asin sa “masakit na panahon” tanganing otobon an iinorden sa sainda nin Dios na trabahong ‘paggibo nin mga disipulo.’ (2 Timoteo 4:2; Mateo 28:​19, 20) Maski sa kadagaan kun saen sinda nakaeeksperyensia nin pagtumang, an mga sadiosan an puso napapaabotan kan pinakamahalagang mensahe manongod sa Kahadean nin Dios, siring sa ipinaheheling kan minasunod na mga eksperyensia.

◻ Sa sarong isla sa solnopan na Pasipiko kun saen prohibido an gibohon kan Mga Saksi ni Jehova, narisa nin sarong 12 anyos na aking lalaki na sia napalilibotan nin maraot na kairiba sa eskuelahan. An kadaklan sa saiyang mga kaklase parateng nagsisigarilyo, nagbabasa nin pornograpikong mga babasahon, nanriribok sa mga maestro, asin nagpaparapakiiwal. Naggrabe an situwasyon kaya hinapot kan aki an saiyang ama kun puede siang bumalyo sa ibang eskuelahan. Minsan siring, an ama nangatanosan sa saiyang aki kontra sa siring na ideya, huling hinohona nia na pareho man sana an mga gawe-gawe kan mga estudyante sa ibang kataraed na eskuelahan. Pero, paano nia tatabangan an saiyang aki?

Nagirumdoman kan ama na may libro sinda sa harong para sa mga hoben. Regalo iyan nin sarong paryente na saro sa Mga Saksi ni Jehova. Kaya hinanap nia an libro, asin kan makua iyan, itinao nia iyan sa saiyang aki. Iyan may titulong Questions Young People Ask​—Answers That Work.a Nanompongan kan aki na espesyalmenteng nakatatabang an kapitulo na “How Can I Cope With Peer Pressure?” Bako sanang itinokdo kaiyan sa saiya an halaga nin pagpapadanay nin paggalang sa sadiri kundi tinokdoan man sia kaiyan kun paano mataktikang masayuma kun probaran kan iba na impluwensiahan siang sumunod sa mangmang na dalan. Paagi sa pag-aplikar kan Makakasuratan na mga prinsipyo na yaon sa libro, nanodan kan solterito kun paano papangganahan an impluwensia nin kairiba.

Naririsa ini asin an iba pang positibong mga pagbabago sa saiyang aki, an ama nagdesisyon na basahon an libro. Naghanga sa praktikal na mga hatol na yaon sa libro, an ama nakiolay sa Mga Saksi ni Jehova na magkaigwa nin pag-adal sa Biblia sa harong. Kan huri, an ibang miembro kan saiyang pamilya uminayon sa saiya sa pag-adal. An resulta? An aking lalaki, an saiyang ngohod na tugang na lalaki, an saiyang ama, asin an duwa sa mga apoon kan aki mga Saksi ni Jehova na ngonyan.

◻ Sa iyo man sanang kadagaan, duwa sa mga Saksi ni Jehova an ibinilanggo huli sa saindang estriktong pagkuyog sa mga prinsipyo kan Biblia. Minsan siring, dai ninda tinogotan an saindang situwasyon na makaolang sa sainda sa mapusong pagtaram manongod sa Kahadean nin Dios. Nagdolok sinda sa sarong opisyal sa bilanggoan asin tinogotan sinda na selebraron duman an Pamanggihan kan Kagurangnan. Kanigoan an kaogmahan ninda kan an 14 preso magpahayag nin interes sa Biblia asin uminayon sa mga Saksi para sa mahalagang okasyon na ini! Pakatapos na sinda makaluwas, an nagkapira sa sainda nagpadagos na mag-adal sa Biblia asin makiasosyar sa Mga Saksi ni Jehova.

Sa labing 25 nasyon, an Mga Saksi ni Jehova nagsasakit bilang resulta nin mga pagprohibir o laen-laen na klase nin pagtumang o paglamag. Minsan siring, arog kan mga apostol sinda nagpapadagos na “dai nin ontok sa pagtokdo asin pagpahayag kan maogmang bareta dapit ki Cristo, si Jesus.”​—Gibo 5:42.

[Nota sa Ibaba]