Siisay an Nagkokontrol?
“SIISAY an namamahala sa kinaban?” Kun may mahapot sa saindo kaiyan, ano an isisimbag nindo? An kadaklan na tawong relihioso tibaad magsabing an “Dios” o si “Jesus.” An sarong artikulo na nagluwas sa The Freeport News, sarong diaryo sa Bahamas, nagtao nin simbag na pipira an maglalaom.
“May nakua akong tract sa sakong pinto,” an pagpoon kan kagsurat kan artikulo. “Sa parate iignorohon ko an siring na komunikasyon, alagad sa panahon na ini nagdesisyon akong basahon iyan. An titulo naghahapot, ‘Siisay an Tunay na Namomoon sa Kinaban?’” Paagi sa pagbasa sa tract na basado sa Biblia, nanodan kan babaeng ini na an namamahala sa kinaban na ini bakong an Dios ni si Jesus kundi si Satanas na Diablo.—Juan 12:31; 14:30; 16:11; 1 Juan 5:19.
“Horophoropa an daing herak na mga pagpalabilabi sa grabeng karingisan,” an paliwanag kan tract. “Ginamit nin mga tawo an mga kuwarto na duman ginagadan an mga bilanggo paagi sa nakaiilong gas, kampo de konsentrasyon, flamethrower, bombang napalm, asin iba pang makababaldeng mga paagi sa pagpadusa asin paggaradanan nin daing herak. . . . Anong mga puwersa an nagtutulod sa mga tawo sa siring kamakababaldeng mga gibo o minamaniobra sinda sa mga kamugtakan na dian napipiritan sindang gumibo nin kabikoan? Naisip-isip na daw nindo kun baga may maraot, dai naheheling na puwersa na nag-iimpluwensia sa mga tawo na gumibo nin siring na mga akto nin kadahasan?” Nakabibigla daw na apodon kan Biblia si Satanas na “dios kan palakaw na ini nin mga bagay”?—2 Corinto 4:4.
Nakaoogma, harani na an panahon na si Satanas asin an saiyang mga demonyo mawawara na. “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:17) Iyo, an Biblia nanunuga na idtong mga naggigibo kan kabotan nin Dios makalalaom na mabuhay sagkod lamang sa sarong matanos na bagong kinaban. (Salmo 37:9-11; 2 Pedro 3:13; Kapahayagan 21:3, 4) Abaang kaginhawahan na haleon an maraot na impluwensia ni Satanas asin an saiyang mga demonyo!
Pakasumaryoha kan mga laog kan sadit na tract na ini, an kagsurat kan artikulo sa The Freeport News nagkonklusyon: “Talagang naoogma ako na binasa ko an tract na iyan . . . huli ta ako nag-iisip man manongod sa kamugtakan kan kinaban, asin kun siisay an nagkokontrol.”