“Mga Mutya nin Katotoohan”

“Mga mutya nin katotoohan.” Iyan an paglaladawan nin sarong surat sa sangang opisina kan Mga Saksi ni Jehova sa Nigeria sa duwang espesyal na magasin. An kagsurat, sarong hoben na lalaki, nagpapaliwanag:

“Nagsurat ako tanganing ipahayag an sakong odok sa boot na pasasalamat sa saindong mga paghihingoa na komentohan an haros gabos na aspekto nin pan-aroaldaw na buhay paagi sa mga magasin na An Torrengbantayan asin Awake!

“Ako 17 anyos. Kan nakaaging taon an sarong lokal na istasyon nin radyo nag-isponsor nin kontest sa pagsurat nin komposisyon manongod sa temang ‘Orog Pa an Kalabot sa Pagkamoot Kisa sa Sekso​—Tunay an AIDS.’ An kada komposisyon dapat na dai bumaba sa apat na gatos na tataramon. Itatao an premyong 1,000 naira [$12.50, E.U.] sa pinakamarahay na komposisyon. Siempre, sabi ninda, maninigong sumurat an mga tawo bako sanang tanganing manggana nin premyo kundi, imbes, tanganing may manodan. . . .

“Nakakua ako nin impormasyon dapit sa AIDS sa duwang magasin. Manongod sa pagkamoot, igwa nin kadakol na artikulo. Ginamit ko an mga punto sa Awake! na Agosto 8, 1978.

“Duwa sanang bulan pakapadara ko kan sakong komposisyon, luminuwas an mga resulta. Sa sakong pagkasorpresa, ako an nagprimera sa mga estado nin Cross River asin Akwa Ibom!

“An gabos na impormasyon na ginamit ko hale sa mga magasin. Talagang marahayon na nagtatao si Jehova nin napapanahon na impormasyon para sa sato sa maribok asin may depektong kinaban na ini. Bilang tunay na mga Kristiano, aram niato na orog pang marhay an kalabot sa pagkamoot kisa sa sekso. Asin, siempre, an pagkaigwa nin malinig, moral na pamumuhay nagpoprotehir sa sato sa mga helang na siring kan AIDS.

“Mayo akong maginibo kundi pasalamatan kamo para sa mga mutyang ini nin katotoohan na mayong kapagalan na pinoprodusir nindo. Padagos logod na bendisyonan ni Jehova an saindong mga paghihingoa mantang padagos nindong itinatao an mahalagang marhay na mga magasin na ini.”