Bareta kan mga Parabalangibog kan Kahadean
Sia Nakanompong nin “Sarong Perlas na Dakulaon an Halaga”
“AN KAHADEAN kan kalangitan nakakaagid sa sarong parabariwas na naghahanap nin magagayon na perlas. Kan sia makakua nin sarong perlas na dakulaon an halaga, napaduman sia asin ipinabakal tolos an gabos niang sadiri patin binakal iyan.” Paagi sa mga tataramon na ini, ilinadawan ni Jesus an labi-labing halaga kan Kahadean nin Dios. (Mateo 13:45, 46) An mga minimidbid an halaga kan Kahadean sa parate naggigibo nin darakulang personal na pagsasakripisyo tanganing makamtan iyan. Ilinaladawan ini kan minasunod na eksperyensia hale sa Distrito nin Pingtung, Taiwan.
Kan 1991, si Mr. asin Mrs. Lin nagpoon na mag-adal kan Biblia kaiba kan Mga Saksi ni Jehova. Kan maaraman iyan nin sarong lokal na klerigo, pinagmaigotan niang paayonon sinda sa saiyang iglesia. Mantang an negosyo kan mag-agom na Lin pagpabakal nin dugo nin orig asin pato sa lokal na sadan, nagdesisyon sinda na ihapot kun ano an punto de vista kan klerigo sa bagay na iyan. “An gabos na ginibo nin Dios puedeng kakanon nin tawo,” an simbag nia. Sa ibong na lado, an mga Saksi pinarigon an boot ninda na estudyaran an sinasabi kan Tataramon nin Dios. Nanodan ninda na sagrado an dugo sa pagmansay ni Jehova Dios, huli ta “an buhay nin sarong linalang iyo an dugo.” (Levitico 17:10, 11, The New English Bible) Kun siring an tunay na mga Kristiano dapat na “maglikay sa . . . dugo.” (Gibo 15:20) Bilang resulta kan pagsiyasat kan Kasuratan sa temang ini, an mag-agom na Lin nagdesisyon na pondohon an pagpabakal nin dugo, dawa ngani iyan an mayor na pinagkukuanan ninda kan saindang entrada. Minsan siring, sa laog nin halipot na panahon, napaatubang sinda sa mas dakula pang pagbalo.
Antes manodan an katotoohan, an mag-agom na Lin nakatanom na nin 1,300 na poon nin bunga sa saindang daga. Minsan ngani aaboton nin limang taon bago mapakinabangan an mga kahoy, kun an mga iyan magin biyo nang produktibo, puedeng laoman kan mag-agom na Lin na makaganansia nin $77,000 kada taon. Mantang nagrarani an panahon kan primerong pag-ani, an mag-agom na Lin kaipuhan na gumibo nin mahalagang desisyon. Naaraman ninda paagi sa saindang pag-adal kan Biblia na kaipuhan na linigan kan mga Kristiano an saindang sadiri “sa lambang ramog nin laman asin espiritu” paagi sa paglikay sa paggamit, o pagpalakop, kan maating mga bisyo na siring sa pagtabako, pagdodroga, asin pagmama. (2 Corinto 7:1) Ano daw an gigibohon ninda?
Mantang nasasakitan huli sa purisaw na konsensia, nagdesisyon si Mr. Lin na pumondo sa pag-adal. Mientras tanto, si Mrs. Lin nagpabakal kan mga bunga hale sa saindang mas gurang na mga poon asin nakaganansia nin labing $3,000. Panamit sana ini kan makukua sa dai mahahaloy kun papagdanayon ninda an saindang mga kahoy. Minsan siring, padagos na nakonsensia si Mr. Lin.
Nakipagtusayan sia sa isyu sagkod na sarong aldaw hinagad nia sa lokal na mga Saksi na palodon an saiyang mga poon nin bunga para sa saiya. Ipinaliwanag kan mga Saksi na iyan desisyon na dapat niang gibohon; kun siring, kaipuhan niang ‘pasanon an saiyang sadiring pasan’ asin palodon nia mismo an mga kahoy. (Galacia 6:4, 5) Pinarigon ninda an saiyang boot na girumdomon an panuga sa 1 Corinto 10:13, na nagsasabi: “Mayong sugot na uminabot sa saindo kundi idto sanang komun sa mga tawo. Alagad fiel an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” Nakipangatanosan man sa saiya an mga Saksi, na nagsasabi: “Kun palodon niamo an saimong mga kahoy para sa saimo, tibaad panganugnan mo iyan asin ibasol mo sa samo an kapierdihan.” Paghaloyhaloy, napagmata si Mrs. Lin sa tanog nin lagadi na karokadena an tarom. Pinapalod kan saiyang agom asin mga aki an mga poon nin bunga!
Napatunayan ni Mr. Lin na inootob ni Jehova an Saiyang panuga. Nakakua sia nin trabaho na nagtogot sa saiya na magkaigwa nin malinig na konsensia, na nagpangyari sa saiya na magin paraomaw ki Jehova. Sia nabautismohan sa sarong pansirkitong asamblea kan Mga Saksi ni Jehova kan Abril 1996.
Iyo, si Mr. Lin garo man sana ‘ipinabakal an gabos niang sadiri’ asin binakal an “sarong perlas na dakulaon an halaga.” Ngonyan sia igwa nin dai masokol na pribilehio na magkaigwa nin personal na relasyon ki Jehova Dios asin maglingkod sa intereses kan Saiyang Kahadean.