Sinorog kan Korte Suprema nin Connecticut an mga Diretso nin Pasyente
Kan Abril 16, 1996, sinorog kan Korte Suprema nin Connecticut, E.U.A., an diretso kan Mga Saksi ni Jehova na sayumahan an mga pag-ineksion nin dugo. Rinebokar kan desisyon na ini an mas naenot na desisyon nin sarong korte hudisyal.
Kan Agosto 1994, si Nelly Vega, saro sa Mga Saksi ni Jehova, nagpoon na awasan nin grabe pakapangaki sa saiyang panganay. Dai nagin epektibo an mga paghihingoang mapongpong an pag-awas sa saiya. Mantang naggagrabe an kamugtakan ni Mrs. Vega, hiningoa kan ospital na kumua nin orden kan korte na nag-aautorisar sa pag-ineksion nin dugo. Pinirmahan na ni Mrs. Vega an sarong medikal na kasuratan sa pagkaabsuelto sa paninimbagan na nagtataong instruksion na mayong dugo o mga gikan sa dugo na itatao sa saiya durante kan saiyang pagkaospital, na paagi kaiyan inaabsuelto an ospital sa ano man na paninimbagan sa mga resulta kan saiyang desisyon. Minsan siring, nangatanosan an ospital na an pagpirit na mag-ineksion nin dugo para sa pinakaikararahay kan bagong mamundag, na, sa pangangatanosan kan ospital, nangangaipo kan ina kaiyan. Nagin mahalaga man sa korte hudisyal an bagay na, apuera sa pag-awas sa saiya, si Mrs. Vega hoben pa, marahay an salud na babae. Sa siring, sa ibong kan mga pagprotesta kapwa kan agom ni Mrs. Vega asin kan abogado nia, itinao kan korte an orden asin ginibo an mga pag-ineksion nin dugo.
Pag-abot nin panahon, dinara an kaso sa Korte Suprema nin Connecticut. Duman, sararong nadesisyonan na an ginibo kan ospital nagbalga sa mga diretso ni Mrs. Vega. An desisyon nagsabi: “An pagbista sa atubangan kan korte hudisyal ginibo sa kamatangaan kan banggi, sa irarom nin labi-labi kaemerhensiang mga kamugtakan na bakong paborable sa kakayahan kan man-ibong-ibong na lado na biyong ikapaliwanag an mga argumento kaiyan.”
An desisyon na ini kan Korte Suprema nin Connecticut mahalaga para sa mga tawo apuera sa Mga Saksi ni Jehova. “Importante iyan para sa gabos na pasyente na tibaad dai oyon sa mga desisyon kan saindang doktor,” sabi ni Donald T. Ridley, an abogado ni Mrs. Vega. “An desisyon maolang sa mga ospital na ligison an mga pamantayan sa buhay nin mga pasyente, baga man relihioso o sekular.”