Pagsakdo nin “Hararom na Katubigan”
AN SARONG talinhaga sa Biblia nagsasabi: “An hatol sa puso nin tawo siring sa hararom na katubigan, alagad an tawong may pagmansay iyo an masakdo kaiyan.” (Talinhaga 20:5) Kan mga panahon kan Biblia mas masakit na sumakdo nin tubig kisa sa dakol na nasyon ngonyan. Kan makipag-olay si Jesus sa Samaritana, binubutong nia an tubig paitaas hale sa burabod ni Jacob, sarong bubon na mga 23 metros an rarom!—Juan 4:5-15.
Siring sa ipinaririsa kan Talinhaga 20:5, an pakamansay na kaipuhan tanganing paluwason an hararom na mga ideya asin saboot na nakatanom sa puso nin saro siring nanggad sa paghihingoang kaipuhan sa pagsakdo sa sarong bubon. Totoo ini sa kadaklan na kabtang nin buhay. Halimbawa, posibleng may midbid kamong mga indibiduwal na sa nag-aging dakol na taon nakatipon nin dakol na kaaraman asin eksperyensia. Kun an mga ini mayong tendensia na boluntaryong magtao nin sadol minsan dai hinahagad, tibaad kaipuhan nindong enganyaron sindang magtaram. Paagi sa pagpaheling nin interes, mga paghapot, asin mataktikang pagsiyasat, garo man sana itinutunton nindo an saindong balde sa sarong hararom na bubon nin kadonongan.
An hatol sa Talinhaga 20:5 aplikado man sa pamilya. Sa parate, an mga agom na babae nadadangog na nagsasabi: “Dai sako sinasabi kan agom ko an saboot nia!” An sarong agom na lalaki tibaad magsabi: “Basta dai na sana ako ginigirong kan agom ko!” Sa siring na mga situwasyon, kaipuhan an pakamansay tanganing mapaluwas an mga ideya na nasa irarom kan puso nin sarong agom. An mataktikang mga hapot (Ano nasakitan ka ngonyan na aldaw? Anong nangyari? Paano ako makatatabang?) parateng nagigin kapinonan nin puso sa pusong komunikasyon. An pagpaheling nin siring na pakamansay pakokosogon an bogkos nin pag-agoman, sa kapakinabangan kapwa kan agom na lalaki asin babae.