An Sampulong Togon
NADISKOBRE kan obispo kan Gloucester sa Inglaterra na labing kabanga kan mga klerigo sa saiyang diosesis an dai kayang otrohon an Sampulong Togon, asin 10 porsiento sa sainda an dai aram kun saen iyan makukua sa Biblia. Alagad iyan 450 taon na an nakaagi. Nagrahay daw an situwasyon poon kaidto? Dai nanggad—siring sa ihinayag nin dai pa sana nahahaloy na daing pili na surbey kan Sunday Times sa mga klerigong Anglicano.
Sa 200 na klerigong ininterbio, 34 porsiento sana an tuom an enterong Sampulong Togon. Kabilang sa iba pa, an saro nagsaboot na iyan negatibong marhay, asin an saro pa nagsabi na an mga iyan daing koneksion sa moral na mga problema sa presenteng panahon.
Aram daw nindo an Sampulong Togon o kun saen iyan manonompongan? Iyan itinala sa Exodo, an ikaduwang libro kan Biblia, an enot na 17 bersikulo kan kapitulo 20. Taano ta dai nindo basahon iyan? Uya an sarong simpleng paagi sa paggrupogrupo kaiyan. An enot na apat manongod sa satong pagsamba sa Dios, an ikalima idinodoon an buhay pampamilya, an numero sais sagkod nuebe dapit sa satong relasyon sa satong kapwa, asin an ikasampulo napapalaen, na nagpapangyari sa sato na siyasaton an sato mismong puso, aramon an satong mga motibo. Uya an sarong halipot na sumaryo sa kun paano puedeng iaplikar nin mga Kristiano an mga prinsipyong iyan.
Enot: Itao niato sa satong Kaglalang an esklusibong debosyon. Ikaduwa: Dai maggamit nin mga imahen sa pagsamba. Ikatolo: Pirmeng igalang asin tawan nin dignidad an ngaran nin Dios. Ikaapat: Magtao nin panahon tanganing magkonsentrar sa espirituwal na mga bagay, na mayong disturbo. Ikalima: Mga aki, igalang an saindong mga magurang. Ikaanom: Dai maggadan. Ikapito: Likayan an pagsambay. Ikawalo: Dai maghabon. Ikasiyam: Magsabi nin katotoohan. Ikasampulo: Rayoan an kaaraan.
An Sampulong Togon kabtang kan kodigo nin mga ley na itinao ki Moises. Alagad an mga prinsipyo na irinerepresentar kan mga iyan dai apektado nin panahon. (Roma 6:14; Colosas 2:13, 14) Sa dahelan na ini, an mga parasunod ni Jesus kinotar asin sinambit an Sampulong Togon. (Roma 13:8-10) Kanigoan kutana kamas maogma—asin kadaing peligro—an buhay ngonyan kun an gabos iginalang asin namuhay oyon sa ipinasabong nin Dios na mga prinsipyong ini!