An Ikinagadan daw ni Maria Natural na mga Causa?

OYON sa peryodiko sa Batikano na L’Osservatore Romano, an doktrinang Katoliko na Asuncion nagsasabi: “An Birhen Inmaculada, na iningatan na dai apektado kan gabos na digta kan orihinal na kasalan, dinarang hawak asin kalag pasiring sa langitnon na kamurawayan, kan matapos an saiyang daganon na buhay.” An katokdoan na ini naggiya sa nagkapirang teologong Katoliko na maghingako na si Maria “dai nagadan asin ensegidang iinitaas hale sa daganon na buhay pasiring sa langitnon na kamurawayan,” an sabi kan peryodiko.a

Kasuarin pa sana, si Papa Juan Paulo II nagtao nin laen na liwanag dapit sa bagay na ini. Sa Pankagabsan na Publiko sa Batikano kan Hunyo 25, 1997, sia nagsabi: “An Bagong Tipan mayong itinataong impormasyon dapit sa mga kamugtakan kan magadan si Maria. An pagigin silensiong ini minagiya sa saro na ipamugtak na iyan nangyari sa natural na paagi, na mayo nin detalye na partikularmenteng mahalagang sambiton. . . . An mga opinyon na gustong ipuera sia sa pagkagadan huli sa natural na mga causa garo baga daing basehan.”

An pahayag ni Papa Juan Paulo naghahayag nin sarong seryosong depekto sa opisyal na doktrinang Inmaculada Concepcion. Kun an ina ni Jesus “iningatan na dai apektado kan gabos na digta kan orihinal na kasalan,” paanong an ikagagadan ni Maria “natural na mga causa,” na bunga kan kasalan na ipinamana kan makasalan na si Adan? (Roma 5:​12) An teolohikong problema na ini resulta kan biribid na punto de vista kan Iglesia Katolika dapit sa ina ni Jesus. Bakong makangangalas na naglataw an pagkabaranga asin pagkaribaraw sa laog kan Iglesia Katolika dapit dian.

Minsan ngani ilinaladawan kan Biblia si Maria bilang sarong mapakumbaba, fiel, asin deboto, dai kaiyan iinaatribwir an mga kualidad na ini sa sarong “inmaculada concepcion.” (Lucas 1:​38; Gibo 1:​13, 14) An Biblia nagsasabi sana: “An gabos nagkasala asin nagkulang sa kamurawayan nin Dios.” (Roma 3:23) Iyo, si Maria nagmana nin kasalan asin pagkabakong sangkap arog kan iba pang mga tawo, asin mayo nin ebidensia na laen an ikinagadan nia apuera sa natural na mga causa.​—Ikomparar an 1 Juan 1:​8-​10.

[Nota sa Ibaba]