Sarong Gibohon na “Dai Puedeng Dai Makapukaw nin Paggalang”

SINADOL ni apostol Pedro an saiyang mga kapwa Kristiano: “Papagdanayon na marahay an saindong gawe-gawe sa tahaw nin mga nasyon, tanganing, sa mga bagay na ipinagtataram ninda kontra sa saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios.” (1 Pedro 2:​12) Sa laog nin dakol na taon ipinaheling sa publiko kan Mga Saksi ni Jehova sa Italia an siring na marahay na gawe-gawe. Oyon sa kahulogan kan instruksion ni Jesus na ‘maghulit hale sa mga atop,’ hayag nindang ginigibo an gabos nindang Kristianong aktibidad, na heling-heling kan publiko. (Mateo 10:27; Juan 18:20) Bilang resulta, kan an sarong Italianong abogado asin sarong padi magpublikar nin mga akusasyon na an Mga Saksi ni Jehova “sarong sektang sagin relihioso” asin ibinilang sinda sa “hilom na mga sosyedad na nansisilo sa mga tawo,” an mga Saksi nagdesisyon na magsangat nin asunto huli sa mapagpakaraot na mga deklarasyon.

Sa primerong pagbista, an korte nagdesisyon na an abogado asin an padi daing ley na binalga. Minsan siring, kan Hulyo 17, 1997, binaliktad kan Korte de Apelasyon sa Venecia an desisyon kan primerong korte, na nakuang may sala an duwang akusado. An Korte de Apelasyon nagsabi: “An ipinublikar na mga artikulo na kinukustion pareho igwa nin mga tataramon asin frase na puede nanggad na makaraot sa reputasyon kan mga parasunod sa relihion kan ‘Mga Saksi ni Jehova.’ Malinaw na an katuyohan kan mga artikulo iyo na isapeligro an mga parasunod kaiyan sa pagduhagi kan publiko.” Sinabi kan korte na an mga artikulo “bakong lehitimong paggamit kan diretso na magbareta asin maghusgar.” Pinamulta kan korte an duwang parapakaraot asin pinagbotan man sinda na bayadan an gabos na gastos sa korte, kabale na an gabos na legal na gastos kan mga Saksi sa duwang kaso.

Sa nasusurat na desisyon kaiyan, an Korte de Apelasyon sa Venecia nagkomento: “Paagi sana sa pagbalanse asin pagprotehir kan gabos na diretso na ginagarantiyahan kan Konstitusyon [nin Italia] na malilikayan an mga porma nin dai pagpahunod asin relihiosong pagkapanatiko.” An desisyon nagrerekonoser na an aktibidad kan Mga Saksi ni Jehova bakong hilom ni sagin relihioso. “An pagklasipikar sa mga Saksi na kabilang sa hilom na mga sosyedad,” sinabi kan korte, “dai ngani minagalang sa pinagbabasaran sa paghusgar sa historikong katotoohan, mantang an hinihingakong relihion presente sa dakol na siudad asin an lakop na paggibo nin proselito kan mga miembro kaiyan, partikularmente kun Domingo asin iba pang piesta opisyal, midbid na marhay asin dai puedeng dai makapukaw nin paggalang sa paghihingoang ginigibo, ano man an tibaad iniisip nin saro manongod sa doktrinang ihinuhulit.” Sa siring, an rekord nin maigot na paghuhulit asin arogan na gawe-gawe kan Mga Saksi ni Jehova sa Italia nakatabang na mawara an prehuwisyo tumang sa sainda.​—Mateo 5:​14-​16; 1 Pedro 2:​15.