Namimidbid daw Nindo an Kalaenan nin Tama sa Sala?
“Ako mismo an may paninimbagan sa paggadan sa mga 25 katawo. . . . Naiimahinar ko iyan barobanggi, aroaldaw. Pinangungum-um ako. . . . Tibaad nasa sarong lugar ako asin nakaheheling ako nin lalauogon na nagpapagirumdom sa sako kan mga ginadan ko. Naheheling ko iyan nin buhay na buhay, na garo iyan nangyari ngonyan, sa mismong oras na ini. . . . Dai ko mapatawad an sadiri ko sa mga bagay na ginibo ko.”—V.S.
“Pinagbotan ako na paduman asin gadanon an enemigo. . . . Dai ako tuminukaw asin nag-isip-isip kun manongod sa mga lalaki, babae asin aki. . . . An pagmate ko kaidto asin sagkod ngonyan naghiro ako oyon sa pagkadirehir sa sako, asin ginibo ko an mga pagboot na itinao sa sako asin sa pagmate ko dai ako nasala sa paggibo kaiyan.”—W.C.
KAN Marso 16, 1968, an duwang tawo na kinotar sa enotan nakikabtang sa kan huri sinabing makasosopog na krimen sa panahon nin guerra. Sinda, kaiba an iba pang soldados, naglaog sa sarong sadit na baryo sa Vietnam asin ginaradan an ginatos na sibilyan—pati an mga babae, aki, asin may edad nang lalaki. Alagad mangnoha an magkalaen na reaksion kan duwang soldados na ini. An enot na soldados malinaw na tinotormento kan saiyang ginibo. An ikaduwa naghohona na may katanosan an saiyang ginibo. Paano nangyari na an duwang tawo magkaigwa nin magkalaen na marhay na reaksion sa iyo man sanang inagihan?
An simbag may koneksion sa konsensia—sarong kakayahan na tao nin Dios na nakatatabang sa sato na sadiosan na helingon an satong sadiri asin husgaran an satong mga hiro-hiro asin intension. An konsensia iyo an satong panlaog na pakaaram sa tama asin sala.
Kun nagdedesisyon, an nagkapira minasandig sa sarabihon na, “Pagiya ka sa saimong konsensia.” Minsan siring, makamomondo ta an konsensia bakong pirmeng masasarigan. Sa katunayan, dakol an pinabayaan an asin nagkomiter pa ngani nin makatatakot na mga kabikoan, asin dai man lamang sinda rinibok kan saindang konsensia. (Juan 16:2; Gibo 8:1) Arog kan ikinomento sarong beses kan nobelistang Ingles na si Samuel Butler, an konsensia “madaling pumondo sa pagtaram sa mga habong magdangog dian.”
Mapagtitiwalaan daw nindo an saindong konsensia? An simbag dependeng gayo sa kun gurano karahay an pagkapatood dian, arog kan ipaheheling kan kasunod na artikulo.
[Pasasalamat para sa pinagkuanan kan retrato sa pahina 3]
Nasa itaas na eksena nin guerra: Retrato kan U.S. Signal Corps