“Siisay an Nagbugtak nin Kadonongan sa mga Suon nin Panganoron”?
“KUN nakakaheling kamo nin panganoron na naghahale sa solnopan, minasabi tolos kamo, ‘May nagdadangadang na bagyo,’ asin iyan nangyayari. Asin kun naheheling nindo na minahoyop an doros hale sa timog, sinasabi nindo, ‘Magigin mainit na marhay,’ asin iyan nangyayari.” An mga tataramon na ini ni Jesus, na isinurat kan kagsurat nin Ebanghelyo na si Lucas, mga halimbawa nin pagprediktar sa kamugtakan nin panahon na ginibo kaidto sa suanoy na Palestina. (Lucas 12:54, 55) Sa nagkapirang kamugtakan, nababasa kan mga tawo kan suanoy an mga tanda asin nakakagibo nin eksaktong panmadalian na mga prediksion.
Ngonyan, an mga meteorologo naggagamit nin komplikadong mga instrumento, arog baga nin mga satelayt na naglilibot sa daga, radar na Doppler, asin darakula an kapasidad na komputer, sa pagdeterminar kan dalagan nin panahon sa mas halawig na mga peryodo. Alagad parateng sala an saindang mga prediksion. Taano?
Dakol an dahelan kun taano ta masakit an eksaktong pagprediktar sa kamugtakan nin panahon. Halimbawa, puedeng magin komplikado an problema huli sa dai patienot na naheheling na mga pagliliwat sa temperatura, harasahas, kosog nin aire, asin rikas saka direksion nin doros. Dagdag pa digdi an komplikadong mga interaksion kan saldang, panganoron, asin kadagatan, na dai pa lubos na nasasabotan kan mga sientista. Sa rason na iyan, an pagprediktar sa kamugtakan nin panahon sagkod ngonyan bakong eksaktong siensia.
An limitadong kaaraman nin tawo manongod sa kamugtakan nin panahon nagpapagirumdom sa sato kan mga ihinapot ni Job: “Siisay an kag-aki sa mga tagdo kan ambon? Kiisay na tulak aktuwal na minaluwas an yelo? . . . Ikalalangkaw mo daw an saimong tingog sa panganoron, tanganing an kadakol na paitaas-pababang tubig mismo makatahob sa saimo? . . . Siisay an nagbugtak nin kadonongan sa mga suon nin panganoron, o siisay an nagtao nin pakasabot sa nangyayari sa langit? Siisay an makabibilang nin eksakto sa mga panganoron na may kadonongan, o an mga dulay nin tubig sa langit—siisay an makatutumba kaiyan?”—Job 38:28-37.
An simbag sa gabos na hapot na ini, Bakong tawo kundi si Jehova Dios. Iyo, gurano man garo baga kadonong kan tawo, an kadonongan kan satong Kaglalang orog nanggad kahalangkaw. Talagang mamomoton sia na ipaaram sa sato an saiyang kadonongan paagi sa mga pahina kan Biblia, tanganing magibo niatong mapanggana an satong dalan.—Talinhaga 5:1, 2.