“Siring sa Saindo an Linalaoman sa Samo nin Dios na Igawe Mi”

HULI sa pakikikooperar sa sekular na mga autoridad “dahel sa Kagurangnan,” makakalaom an mga Kristiano na umako nin ‘pag-omaw bilang mga paragibo nin marahay.’ (1 Pedro 2:13-15) Naeksperyensiahan ini kasuarin pa sana kan Mga Saksi ni Jehova sa Aprika del Sur sa sarong pandistritong kombension na ginibo ninda sa hall nin sarong kampus sa kolehio.

Sa enot na aldaw kan kombension, an mga pulis na guardia sa kolehio nag-andam para sa parate nang anggot asin daing kooperasyon na mga delegado, siring kan saindang naeksperyensiahan sa ibang klase nin mga kombension. Minsan siring, huling dai pang nakaaging pakipagtratar sa Mga Saksi ni Jehova, siertong makakaeksperyensia sinda nin maogmang pagkasorpresa!

Bilang kabtang kan saindang regular na pagsiyasat para sa seguridad sa mga trangka, rinekisa kan mga pulis na guardia an lambang sasakyan na minalaog asin minahale sa solar. Nasorpresa sinda kan sinda taratarahon nin makikatood, mapasensia, asin magalang, minsan ngani nakaatraso sa mga delegado an mga pagrekisa. Mayo kan parate nang pagsayuma, pakidiskusion, asin mapan-insultong pananaram. “Bakong arog kan ibang mga bisita,” an sabi kan sarong guardia, “kamo nagpapaheling nin mapakumbabang aktitud asin toninong na dignidad na risang-risa niamo gabos.”

Kan maaraman kan hepe kan mga guardia an makikooperar na gawe-gawe kan Mga Saksi ni Jehova, nagdesisyon sia na dai na kaipuhan na rekisahon an mga sasakyan “huli ta,” an sabi nia, “disiplinado nanggad kamong marhay.” Bilang resulta, an mga sasakyan na may sticker na “JW” para sa pagparada pinalaog na dai rinerekisa.

Pagkatapos kan kombension, an hepe kan mga guardia nagsabi na linalaoman niang maheling liwat duman an mga Saksi sa dai mahaloy. “Dai pa kami noarin man nakaheling nin siring katoltol na mga tawo,” an sabi nia. “Siring sa saindo an linalaoman sa samo nin Dios na igawe mi.” An komendasyon na iyan saro pang pan-enganyar sa tunay na mga Kristiano na ‘papagdanayon na marahay an gawe-gawe,’ tanganing an mga tawo ‘pamurawayon an Dios huli sa marahay na mga gibo na saindang naheheling.’—1 Pedro 2:12.