“Patoodon Mo an Aki”

AN KAIPUHAN sa mapangganang pag-ataman nin tatamnan bako sanang pagsabwag nin banhi sa daga dangan pagbuelta pakalihis nin pirang bulan para sa pag-ani. Dakol na mahigos na pagtrabaho an kalabot sa pag-andam kan daga, pagsabwag kan mga banhi, asin pagbaribi saka pag-ataman sa mga tinanom tanganing iyan tumalubo nin husto.

An prosesong ini marahay na ilustrasyon kan pagigin totoo kan Talinhaga 22:6, na nagsasabi: “Patoodon mo an aki oyon sa dalan para sa saiya; minsan kun sia maggurang dai sia masiko dian.” Tunay nanggad, an pagpatood nin magurang sarong mayor na nakakokontribwir sa mapangganang pagpadakula nin aki.

Minsan siring, sa mapagkonsinteng kinaban sa presente, dakol na magurang an dai naghihimate sa hatol na ini. Kun saindang sinusunod an pinagkatodan nang kadonongan na an mga aki maninigong makanood na resolberan ninda mismo an mga problema, sa parate an saindang mga aki nagsasadiri na sana. An siring na paagi nagpapangyari sa mga aki na madaling mabiktima nin nakadadanyar na impluwensia nin daing prinsipyo asin daing konsensiang mga indibiduwal.—Talinhaga 13:20.

Orog karahay nanggad na itadom nin mga magurang sa saindang mga aki an Kristianong mga prinsipyo paagi sa diosnon na pagpatood sa amay na edad! Gurano kaamay? “Poon sa pagkaomboy,” an sabi ni apostol Pablo. Iyan an kamugtakan kan hoben na si Timoteo. An saiyang ina, si Eunice, asin an saiyang lola na si Loida itinadom ki Timoteo “an banal na mga kasuratan” kaya sia ‘nakanood’ asin ‘nakombensir na maniwala.’ An resulta? An pagpatood na iyan nagkaigwa nin mahalagang marhay na kabtang sa ‘pagpadonong sa saiya para sa kaligtasan.’—2 Timoteo 1:5; 3:14, 15.

Kaagid ngonyan, an mga magurang na ‘dai minaontok sa paggibo nin karahayan’ mag-aani nin nagsosopay na mga balos kun sinda “dai mapagal.” (Galacia 6:9) An sabi kan madonong na si Hadeng Salomon: “An ama nin sarong matanos siertong magigin magayagaya.”—Talinhaga 23:24.