Kamo daw Nag-iisip Manongod sa Pag-agom?
Kun ikokomparar ta sa linog an nangyayaring diborsio sa bilog na globo, an Estados Unidos an yaon sa episentro. Sa sarong dai pa sana nahahaloy na taon, labi sa sarong milyon na relasyon nin mag-agom an natapos duman—na an promedyo duwa kada minuto. Alagad puedeng aram na marhay nindo na an Estados Unidos dai nanggad nagsosolo sa mga problema kaiyan dapit sa pag-agom.
SEGUN sa sarong pag-adal, an bilang nin mga diborsio sa Canada, Grecia, Inglaterra asin Wales, Netherlands, asin Pransia naglabing doble poon kan 1970.
May dahelan nanggad kita na maniwala na an kadaklan na magkatrato nagpapakasal huli ta nagkakaminootan sinda asin gustong mag-ibaiba sa bilog nindang buhay. Minsan siring, makamomondo na an pangarap na magin maogma an pag-agom sa parate nagigin siring sana kaiyan—sarong pangatorogan. Pagkagimata sa katunayan, dakol an nagsabi na sinda nag-agom nin amay na marhay o sala an naagom o pareho.
Taano ta nasusudya an kadakol na pag-agom? “An pangenot na dahelan iyo an kadaihan nin preparasyon,” sabi kan autor nin sarong libro manongod sa pag-ilusyonan. Sinabi pa nia: “Mantang kinakaolay ko an mga mag-agom na nasasakitan sa mga problema sa pag-agom duwang bagay an namamatean ko nin grabe—pakikidamay asin kaanggotan. Nakakamate ako nin pakikidamay huli ta dai ninda nadiskobre an saindang mga pangarap para sa relasyon na kontento an kada saro. Nakakamate ako nin kaanggotan huli sa pagkaignorante ninda mapadapit sa pagigin komplikado kan trabaho.”
Tunay nanggad, dakol an nag-aagom na kakadikit an o mayo nin ideya kun paano iyan gigibohon na mapanggana. Pero, dai nanggad ini nakabibigla. An sarong edukador nagkomento: “Pira sa mga hoben niato an nakakatapos nin kolehio na pinag-aadalan an hiro-hiro nin mga kino asin tagaw, alagad dai napag-aadalan an hiro-hiro kan duwang tawo na inaapod na mag-agom?”
Kamo daw nag-iisip manongod sa pag-agom—magsalang manongod sa posibleng pag-agom sa ngapit o manongod sa kamugtakan kan saindong pag-agoman ngonyan? Kun iyo, maninigo nindong maaraman na an relasyon sa tunay na buhay laen na marhay sa mga ipinaheheling sa mga pelikula, pasale sa telebisyon, asin sa mga nobelang romansa. Kadungan kaiyan, an pag-inagoman nin duwang maygurang na tawo na tunay na nagkakaminootan puedeng ibilang na bendisyon hale sa Dios. (Talinhaga 18:22; 19:14) Kun siring, paano kamo makaseseguro na kamo preparado nang atubangon an mga kahagadan sa pag-agom? Ano an mga dapat nindong konsideraron sa pagpili nin aagomon? O kun kamo may agom na, paano nindo madudugangan an posibilidad na manompongan an nagdadanay na kaogmahan sa saindong relasyon bilang mag-agom?