Pag-iingat nin Marahay na Ngaran

AN MAINGAT na pag-adal sa sarong magayon na ipininta puedeng magin kapakipakinabang na eksperyensia. Kun hehelingon na marhay, maririsa nin saro kun paano an pintor ginatos na beses na pinaagi an pinsel tanganing bugtakan nin laen-laen na kolor an sarong kambas.

Kaagid kaiyan, an marahay na ngaran nagigibo, bakong paagi sa sarong halakbang na agi nin pinsel, sabi ngani, kundi paagi sa dakol na saradit na gibo sa laog nin sarong lawig nin panahon. Iyo, padikitdikit an satong reputasyon nahahaman paagi sa mga ginigibo niato.

Sa ibong na kampi, an sarong napasalang agi nin pinsel puedeng makaina sa halaga nin ipininta. Iyo man an satong ngaran. An madonong na si Hadeng Salomon nagsabi: “An kamangmangan nin daganon na tawo iyo an minapabiko sa saiyang dalan.” (Talinhaga 19:3) An kaipuhan sana dikit na inaapod na kamangmangan—tibaad madahas na pagputok nin kaanggotan, pagpangana sa mga inomon na de alkohol, o sarong akto nin seksuwal na karigsokan—tanganing atian an marahay na reputasyon. (Talinhaga 6:32; 14:17; 20:1) Kun siring, mahalagang marhay na kita maghingoang magkaigwa nin marahay na ngaran asin magmaigot na ingatan iyan.—Ikomparar an Kapahayagan 3:5.