Makatatabang daw sa Sato Ngonyan an Biblia?
“SA KABILOGAN kan Biblia, mga 1 porsiento an may pakinabang na basahon, alagad an ibang kabtang bakong pertinente asin lipas na sa panahon.” Iyan an sabi nin sarong hoben na lalaki. Dakol an maoyon sa saiya. Minsan ngani an Biblia nagpapadagos na pinakamabenta sa bilog na kinaban, minilyon an nagtatao nin kakadikit na atension dian asin bakong pamilyar sa mga tokdo kaiyan.
Sa pan-Navidad na edisyon kaiyan kan 1996, an peryodiko sa Alemania na Süddeutsche Zeitung nagkomento na “padikit nang padikit an nagbabasa [kan Biblia]. Sa panahon nin natural na mga siensia asin nag-oorog na sekularisasyon, para sa dakol an mga pagkasaysay sa Biblia garo baga palaen asin masakit saboton.” Pinatutunayan nin mga surbey an baretang ini. Ihinahayag nin nagkapirang pagsiyasat na dakol na aki an dai ngani nakakaaram kun siisay man nanggad si Jesus. Sa sarong surbey, mayo pang kabanga kan mga ininterbio an makasasaysay kan mga estorya sa Biblia dapit sa gastador na aki asin sa makikapwa-tawo na Samaritano.
An publikasyon na Reformiertes Forum kan Suizong Iglesia Ebangheliko nagsasabi na sa Switzerland an pangangaipo nin Biblia bako nang arog kan dati. Maski sa mga igwa nin Biblia, sa parate iyan nagdadamot sana nin alpog sa istante. Iyo man an situwasyon sa Britania. Segun sa sarong surbey, minsan ngani an kadaklan na tawo igwa nin kopya kan Biblia, an dakulang mayoriya dai pa nanggad noarin man binasa iyan.
Sa ibong na kampi, minilyon sa bilog na kinaban an may ibang saboot manongod sa Biblia. Minamansay ninda iyan na Tataramon nin Dios asin ibinibilang iyan na mahalaga asin kapakipakinabang. Huli kaini, binabasa ninda iyan nin regular. Sarong hoben na babae an nagsurat: “Hinihingoa kong basahon an saro o duwang kapitulo kan Biblia kada aldaw. Ikinaoogma kong marhay iyan.” Maingat na hinihimate kan siring na mga indibiduwal an itinotokdo kan Biblia, asin hinihingoa ninda na iaplikar an hatol kaiyan sa saindang buhay. Naniniwala sinda na an Biblia makatatabang sa sainda sa maribok na kinaban ngonyan.
Ano an opinyon nindo? An Biblia daw bakong pertinente sa presenteng mga panahon? O iyan daw mahalaga asin kapakipakinabang? Makatatabang daw sa sato ngonyan an Biblia?