Pagdadanay na Maimbod ki Jehova

AN KAIMBODAN, minsan ngani bihira na ngonyan, sarong kualidad na midbid sa mga lingkod kan tunay na Dios, si Jehova. An maimbod na tawo nagdadanay na marigon sa mga pagbalo asin dai natatanyog sa ibong kan pag-agi nin panahon. Estudyare an marahay na si Hadeng Ezequias. “Pakalihis nia mayo na nin nagin arog nia sa gabos na hade sa Juda, dawa idtong nagkaerenot sa saiya,” an sinasabi kan Biblia. Ano an naggibo ki Ezequias na daing kapareho? Sia “padagos na nagdanay ki Jehova,” dawa ngani napalilibotan sia kan mga parasamba sa falsong dios na si Moloc. Iyo, si Ezequias ‘dai suminiko sa pagsunod [ki Jehova], kundi nagpadagos sia sa pag-otob sa saiyang mga togon.’​​—2 Hade 18:​1-6.

Si apostol Pablo saro man na nagdanay na maimbod ki Jehova. An rekord kan saiyang ministeryo na yaon sa Kristianong Griegong Kasuratan malinaw na nagpapatunay sa dayaday na pagtao ni Pablo nin bilog na kalag na paglilingkod sa Dios. Sa paghinanapos kan saiyang buhay sa daga, si Pablo nakasabi manongod sa saiyang sadiri: “Nakipaglaban ako kan marahay na pakilaban, natapos ko an paorumbasan, naingatan ko an pagtubod.”​​—2 Timoteo 4:7.

Abaa karahay na mga halimbawa nin kaimbodan si Ezequias asin Pablo! Arogon logod niato an saindang pagtubod paagi sa pagdadanay na maimbod sa satong Kaharohalangkaweng Dios, si Jehova.​​—Hebreo 13:7.