Siisay an Matapos kan Kadahasan?
KAN Setyembre 1999, maogmang inako kan Sekretaryo-Heneral kan NU na si Kofi Annan an mga delegado sa ika-54 taonan na sesyon kan Junta General. Siring kan irineport sa The Toronto Star, sia nagpaluwas nin angat sa mga namomoon sa kinaban, na nagsasabi: “Kadakol kan tawo na an kaipuhan bako sanang mga tataramon nin simpatiya hale sa internasyonal na komunidad. An kaipuhan ninda tunay asin inootob na kapanugaan na matabang tanganing taposon an pagpabalikbalik nin kadahasan sa sainda, asin darahon sinda sa ligtas na pagbalyo pasiring sa prosperidad.”
Ikakatao daw kan NU asin kan mga nasyon na miembro kaiyan an “tunay asin inootob na kapanugaan” na kaipuhan tanganing taposon an kadahasan? Kinotar sa iyo man sanang report sa Star, si Presidente Bill Clinton kan E.U. nagsabi: “Pakatapos kan gabos na pagpabolos nin dugo sa siglong ini, aram niato na pasil sanang sumabi na ‘nungka nang mangyayari iyan,’ alagad mas depisil na marhay na isagibo iyan.” Idinugang nia: “An panunuga nin sobra puedeng magin siring karingis nin kawaran nin pagmakolog.”
Labing 2,500 na taon na an nakaagi, si propeta Jeremias nagsabi manongod sa mga paghihingoa nin tawo: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” (Jeremias 10:23) Kun siring, ano an paglaom para sa katapusan kan kadahasan?
Arog kan satong mababasa sa Isaias 60:18, an Dios nagtao kan garantiya: “Dai na madadangog sa saimong daga an kadahasan, pagraot o kagabaan sa laog kan saimong mga kasagkodan.” An hula na iyan enot na naotob kan ibalik nin Dios an desterradong banwaan nia sa saindang dagang tinuboan. Iyan igwa man nin mas dakulang kaotoban na maeeksperyensiahan niato. Si Jehova Dios dai ‘nanunuga nin sobra.’ Bilang an Kaharohalangkawe asin Kaglalang kan katawohan, sia an nasa pinakamarahay na kamugtakan na tumapos sa “pagpabalikbalik nin kadahasan.” Sa pagsakop kan Kahadean nin Dios, mangingibabaw an katoninongan. Mawawara na an kadahasan sagkod lamang!—Daniel 2:44.