Pankinaban na Katoninongan—Ano?
MADALI na daw na makamtan an pankinaban na katoninongan? Dakol kaidto an naghohona na iyo alagad ngonyan may pagduda na. Segun sa sarong report na tinatratar an mga angat para sa satong ngapit, na ipinublikar sa Daily Mail & Guardian sa Aprika del Sur, “an mga prediksion dapit sa sarong bagong internasyonal na areglo na ginibo kaidtong 10 taon pa sana an nakalihis garo baga ngonyan sobra na kaoptimistiko.”
Pinensar kan mga autor an pano nin paglaom na aktitud na nangibabaw sarong dekada pa sana an nakaagi. An Malipot na Guerra natapos pa sana, asin an paglalaban kan pinakamakapangyarihan na mga nasyon mayo na. Sa garo baga kapinonan nin sarong bagong kapanahonan, dakol an naglaom na an katawohan mapoon na magkaigwa nin dakulang progreso sa pag-atubang sa kadukhaan, helang, asin mga isyu dapit sa kamugtakan kan palibot. “An mga prediksion na iyan ngonyan garo baga sobrang pag-imahinar nin sangkap na mga kamugtakan,” an sabi kan report. “May bagong mga labanan na puminutok sa mga lugar na haros dai ta aram; an pankinaban na kadukhaan padagos na naggagrabe. Igwa nin duwang bagong kapangyarihan nuklear. An reputasyon kan NU luminuyang marhay huli sa kakulangan kaiyan nin aksion sa sunod-sunod na krisis na humanitaryo. An disposisyon kan isip nagbabago hale sa iniimahinar na lugar na sangkap an mga kamugtakan pasiring sa iniimahinar na lugar na miserable an mga kamugtakan.”
Aram kan mga estudyante sa Biblia na an mga paghihingoa nin tawo, gurano man kanoble, dai noarin man magigin lubos na mapanggana. Taano ta dai? Huli ta, siring sa sinasabi kan Biblia, “an bilog na kinaban namumugtak sa kapangyarihan kan maraot.” (1 Juan 5:19) Mientras na kontrolado ni Satanas, an kinaban dai madadara sa Paraisong kamugtakan na iyo an dahelan na linalang iyan nin Dios.
Kadungan kaiyan, igwa nin basehan para sa optimismo. Nanunuga si Jehova Dios na pangyayarihon an pankinaban na katoninongan, bakong paagi sa pagremedyo sa sistemang ini nin mga bagay, kundi paagi sa pagpangyari sa “sarong bagong daga” kun saen “magdadanay an katanosan.” (2 Pedro 3:13) Iyo, paagi sa Kahadean nin Dios, an satong globo gigibohon na matoninong, maogmang erokan, kun saen an buhay asin trabaho magigin dayaday na kagayagayahan para sa gabos na makinuyog na katawohan. Apuera kaini, nanunuga an Dios na “papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” An mga panugang ini dai nakabase sa daing kasegurohan na mga prediksion nin mga tawo. Imbes, iyan basado sa dai nasasalang Tataramon kan Kaglalang, na dai makakapagputik.—Kapahayagan 21:4; Tito 1:2.