An Pakikilaban Tumang sa Kadukhaan—Ralaban na Dai Puedeng Ganahon?

NAHEHELING kan mga turistang namamasyar sa Naciones Unidas sa Siudad nin Nueva York an Tiriponan kan Konseho sa Pagbuhay Asin Sosyal, na ruluwas an mga tubo sa kisame sa itaas kan pampublikong galeriya. An giya sa pamamasyar nagpapaliwanag: “An ‘dai tapos’ na kisame sa parate ibinibilang na nagpapagirumdom na simbolo na an gibohon kan Naciones Unidas sa pagbuhay asin sosyal nungkang natatapos; pirmeng may orog pang magigibo tanganing maparahay an kamugtakan nin pamumuhay kan mga tawo sa kinaban.”

Minsan ngani an Konseho dusay sa causa na pag-enkaminar nin mas halangkaw na klase nin pamumuhay para sa gabos, an gibohon garo baga daing katapusan. Interesante nanggad, durante kan ministeryo ni Jesu-Cristo digdi sa daga kan enot na siglo C.E., sia nagsabi: “An espiritu ni Jehova yaon sa sako, huli ta linahidan nia ako na magpahayag kan maogmang bareta sa mga dukha.” (Lucas 4:18) Ano an “maogmang bareta” na ipinahayag nia? Iyan an mensahe may labot sa Kahadean na eestablisaron ni Jehova Dios, na nagigin “kakosogan kan dukha [na nasa] kasakitan,” na dian si Jesu-Cristo an Hade. Ano an gigibohon kan Kahadean na iyan? Si Isaias naghula: “Si Jehova kan mga hukbo magibo nanggad para sa gabos na banwaan . . . nin bangkete nin matatabang putahe, bangkete nin arak na laon, nin matatabang putahe na pano nin hotok, nin arak na laon, sinara. Totoong hahalonon nia an kagadanan sagkod lamang, asin papahidon nanggad kan Soberanong Kagurangnan na Jehova an mga luha sa gabos na lalauogon.”​—Isaias 25:​4-6, 8.

Gusto daw nindong makaaram nin orog pa manongod sa kun paano gigibohon kan Kahadean nin Dios na “maparahay an kamugtakan nin pamumuhay kan mga tawo sa kinaban,” tangani na mayo na nin kulang? Helingon an nasa ibaba tanganing maaraman kun paano kamo magkakaigwa nin sarong kualipikadong paratokdo na masongko sa saindo tanganing ipaheling sa saindo an dakol pang sinasabi kan Biblia dapit sa siring na mga bagay.