Pag-operar na Dai Naggagamit nin Dugo—“Sarong Mayor na Uso sa Medisina”
SA IRAROM kan titulong “Pag-operar na ‘Dai Naggagamit nin Dugo,’” an magasin na Maclean’s nagbareta na an mga doktor sa bilog na Canada “igwa nin minumuknang bagong mga pamamaagi na, sa nag-aging limang taon, ginibong mayor na uso sa medisina an inaapod na pag-operar na dai naggagamit nin dugo.” An saro sa sainda iyo si Brian Muirhead, sarong anestesiologo sa Winnipeg’s Health Sciences Centre. Ano an nagtulod sa saiya na maghanap nin ibang paagi nin pagbolong na daing dugo?
Kan 1986, inako ni Dr. Muirhead an angat sa pag-operar sa sarong 70 anyos na lalaki na may nagdudugong ulser na, huli sa saiyang tinutubod na basado sa Biblia bilang saro sa Mga Saksi ni Jehova, naghagad nin pagbolong na dai magamit nin pag-ineksion nin dugo. (Gibo 15:28, 29) Si Dr. Muirhead “guminamit nin bihira nang gamiton na paagi nin pag-ineksion nin saline solution sa pasyente tanganing mapagdanay na halangkaw an saiyang presyon,” an ibinareta kan Maclean’s. “An prosedimiento nagin mapanggana, asin pinakosog kaiyan an nagtatalubong paniniwala ni Muirhead na ‘naggigibo kita nin kadakoldakol na pag-ineksion nin dugo. Naisip ko na panahon nang helingon an mga alternatibo.’”
An paghanap nin paaging mag-operar na dai naggagamit nin dugo “pinahiro kan pagkahadit dapit sa suplay sa ngapit nin idinodonar na dugo—sagkod kan pagkatakot kan dakol na pasyente na maolakitan nin virus nin helang hale sa pag-ineksion nin dugo.” Sa tabang kan pagsiyasat kan mga doktor na matibay umisip nin bagong ideya, bako sanang Mga Saksi ni Jehova kundi dakol na iba pa an nakikinabang. “Apuera sa paghale kan pangangaipo para sa pag-ineksion nin dugo sa dakol na kaso, an pag-operar na dai nagagamit nin dugo nag-iina sa peligro—gurano man kasadit—nin impeksion hale sa maating dugo,” an sabi kan Maclean’s. Alagad dawa an “malinig” na dugo puedeng magtao nin peligro nin impeksion paagi sa temporaryong pag-ampat sa sistema nin inmunidad nin pasyente.
Ano an minasuportar sa marigon na tinutubod kan Mga Saksi ni Jehova may labot sa ibang pagbolong na daing dugo? Tibaad interesado kamo na basahon an brosyur na How Can Blood Save Your Life? Maoogma an Mga Saksi ni Jehova na ihiras iyan saindo.