Kun an mga Panuga Sarong Garantiya

AN KASAYSAYAN pano nin dai inotob na mga panuga. Sa parate dai inootob kan mga nasyon an pormal na pinirmahan na mga kasundoan na dai man-atake, sa siring ginigiyahan an saindang namamanwaan sa teribleng mga guerra. Si Napoleon nagsabi kaidto: “Inootob sana kan mga gobyerno an mga panuga ninda kun napipiritan sindang gibohon iyan, o kun iyan para sa bentaha ninda.”

Kumusta man an mga panuga kan mga indibiduwal? Kanigoan kanakadedesganar kun dai inootob nin saro an saiyang mga tataramon! Nangorognang totoo ini kun sia midbid asin tinitiwalaan nindo. Siempre, tibaad dai kaya o habong otobon nin mga tawo an saindang mga panuga.

Kanigoan an pagkakalaen kan mga panuga nin tawo asin nin Dios! An mga panuga nin Dios biyong masasarigan asin mapagtitiwalaan. An ano man na ipinanuga ni Jehova Dios sarong garantiya. Seguradong maootob iyan. Manongod sa seguradong tataramon nin Dios, an Isaias 55:11 nagsasabi: “Magigin siring man an sakong tataramon na magluwas sa sakong ngoso. Dai iyan mabalik sa sako na mayong nahaman, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.”

Kaya, kun siring, paano niato maninigong mansayon an mga panuga nin Dios na nakasurat sa Biblia? Tunay nanggad na makakasarig kita dian. Halimbawa, si apostol Juan nagsurat: “Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:​3, 4) Makakamtan nindo an siring na mga bendisyon kun mahiro kamo kaoyon kan mga tataramon ni Jesus: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”​—Juan 17:3.