Taano ta Padagos na Nagdadalaw sa Saindo an mga Saksi ni Jehova?

SA BILOG na kinaban, midbid na marhay an pagkadesidido kan Mga Saksi ni Jehova sa saindang ministeryong pagharongharong. May mga tawong nagngangalas kun taano ta an mga Saksi padagos na nagsosongko sa sainda, nangorogna kun sinda dai nagpaheling nin interes kan nakaagi sa mensahe kan mga Saksi. Makakatabang an duwang surat hale sa Rusya tanganing ipaliwanag an dahelan.

“An totoo,” an pag-admitir ni Masha, sarong 19 anyos na babae sa Khabarovsk, “kan nakaagi, linilikayan ko an mga Saksi ni Jehova siring sa damat.” Minsan siring, pagkatapos basahon an pira sanang kopya nin magasin na ipinublikar kan mga Saksi, nabago an saiyang aktitud. “Gabos iyan interesanteng marhay asin nagtatao nin kaliwanagan,” an isinurat ni Masha, “alagad an pinakaimportante, ginigibo kaiyan na mansayon nin saro an kinaban sa laen na paagi. Luway-luway na nagpoon na masabotan ko kun ano an katuyohan nin buhay.”

Hale sa siudad nin Ussuriysk, mga 80 kilometros sa amihanan nin Vladivostok, si Svetlana nagsurat: “Kasuarin ko pa sana pinonan na basahon An Torrengbantayan asin Awake! An mga magasin na ini kaipuhan na marhay sa satong aldaw. Nagustohan ko an gabos na artikulo. Interesante, nakapagtotokdo, asin nagtatao nanggad an mga iyan nin kaliwanagan. Salamat! Salamat na marhay ta yaon kamo sa kinaban na ini asin sa paggibo nindo kan siring na maboot asin mahalagang marhay na gibohon.”

Sineseryoso kan Mga Saksi ni Jehova sa bilog na kinaban an nakapupukaw nin isip na hapot ni apostol Pablo: “Paano man [an mga tawo] makadadangog kun mayo nin parahulit?” (Roma 10:14) Taano ta dai magtao nin pira sanang minuto tanganing maghinanyog sa sunod na pagdalaw sa saindo kan mga Saksi? Tibaad magustohan man nindo an mensahe nin karangahan na yaon sa Tataramon nin Dios, an Biblia.