Maninigo daw Kitang Mag-arang sa mga Anghel Para sa Tabang?

AANGAY daw na mag-arang sa mga anghel sa mga panahon nin kasakitan? Dakol an naghohona na iyo. Sa katunayan, an New Catholic Encyclopedia nagsasabi: “An saro namimibi sa . . . mga anghel . . . alagad sa sentido sana na sinda mangoltanan sa Dios para sa sato.” Maninigo daw kitang mag-arang sa mga anghel tanganing mangoltanan para sa sato?

Itinatao kan Tataramon nin Dios an ngaran kan duwa sana sa fiel na mga anghel nin Dios, si Miguel asin Gabriel. (Daniel 8:16; 12:1; Lucas 1:26; Judas 9) Huling nasasambitan sa Biblia an mga ngaran na ini, namansayan niato na an kada anghel daing kaparehong espiritung persona na may ngaran asin bako sanang sarong impersonal na enerhiya o puersa. Pero, an ibang anghel nagsayumang ihayag an saindang ngaran. Halimbawa, kan hinagad ni Jacob sa sarong anghel na nagbisita sa saiya na ihayag kaini an saiyang ngaran, nagsayuma ini. (Genesis 32:29; Hokom 13:​17, 18) Mayo nin listahan nin mga ngaran kan mga anghel na itinatao sa Biblia, sa siring ilinilikay an mga tawo sa pagtao sa sainda nin dai maninigong atension.

Kaiba sa mga obligasyon kan mga anghel an pagpaabot nin mga mensahe sa mga tawo hale sa Dios. Sa katunayan, an orihinal na Hebreo asin Griegong mga terminong trinadusir na “anghel” literal na nangangahulogan na “mensahero.” Minsan siring, an mga anghel dai nagseserbing mga parapangoltanan na nagdadara nin mga pamibi nin tawo sa trono kan Kaharohalangkawe. Dineterminaran na nin Dios na an mga pamibi ipaabot sa saiya sa ngaran kan saiyang Aki, si Jesu-Cristo, na nagsabi: “Ano man an hagadon nindo sa Ama sa ngaran ko itao nia iyan sa saindo.”​—Juan 15:16; 1 Timoteo 2:5.

Si Jehova Dios nungkang sibot na marhay tanganing maghinanyog sa sato kun kita madolok sa saiya sa tamang paagi. An Biblia nagtatao kan garantiyang ini: “Si Jehova harani sa gabos na nag-aarang sa saiya, sa gabos na nag-aapod sa saiya sa katotoohan.”​—Salmo 145:18.