May Edad Na Alagad Bakong Laom
KUN grabe na an epekto nin paggurang, dakol an nagigin baldado asin nagsosolo sa sosyedad. Bakong siring kaiyan an nagin kamugtakan ni Fernand Rivarol, na nagadan sa edad na 95 sa Geneva, Switzerland. Solo na sia, ta gadan na an saiyang agom asin may sadiri na man na harong an may agom nang aki niang babae. Minsan ngani parate siang nasa harong, dai sia napupungaw. Parate siang minatukaw sa lamesa sa sala, kapot an telepono, asin inaapodan an mga tawo tanganing makipag-olay sa sainda manongod sa espirituwal na mga bagay.
Durante kan saiyang makasaysayan na buhay, may panahon kaidto na si Fernand literal na laom. Taano? Kan panahon na si Fernand asin an saiyang agom nagin aktibong Saksi ni Jehova kan 1939, puminutok an Guerra Mundial II sa Europa. Si Fernand nagdanay sa saiyang basado sa Bibliang desisyon na dai kolgan an siisay man. Huli kaiyan, nawaran sia nin trabaho asin nabilanggo nin nagkapirang beses—lima may kabangang taon gabos—na durante kan panahon na iyan sia napasuway sa saiyang agom asin sadit pang aking babae.
Sa paggirumdom, si Fernand nagsabi: “Para sa dakol, garo baga isinakripisyo ko an sarong seguradong trabaho asin binayaan an sakong pamilya na mayo man lamang nin suporta. Dinuhagi ako nin mga tawo asin ibinilang ako na garo sarong kriminal. Sa ibong kaiyan, kun iniisip ko an depisil na mga taon na idto, mas nagigirumdoman ko kisa iba pang bagay kun paano kami sinuportaran asin tinabangan ni Jehova. Dakol na taon na an nakalihis poon kaidto, alagad an sakong tiwala ki Jehova sagkod ngonyan marigon pa man giraray kapareho kaidto.”
An pagtubod na ini an nagtulod ki Fernand na sabihon sa iba paagi sa telepono an saiyang sono sa Kasuratan na paglaom. Kun igwa siang marahay na nakaolay, pinapadarahan nia nin literatura sa Biblia an tawong iyan. Paghaloyhaloy, inaapodan nia giraray an indibiduwal na iyan tanganing aramon kun nagustohan nia an publikasyon. Kun beses an mga tawo minasimbag paagi sa sarong surat nin apresasyon, na nakakapaogmang gayo sa saiya.
Tibaad makontak kamo nin sarong arog ni Fernand sa lugar nindo. Taano ta dai maghinanyog sa saiyang sasabihon tanganing maaraman an saiyang mga tinutubod? Naoogma pirme an mga Saksi ni Jehova na sabihon sa saindo an saindang mga tinutubod.