“Garo Ako Baoo”

DURANTE kan sigidong siyam na aldaw na kampanya kan Agosto/Setyembre 1929, labing 10,000 an nagpatotoo sa bilog na Estados Unidos. Nakapasakamot sinda nin un-kuarto nin sarong milyon na libro asin buklet. Kabilang sa mga parabalangibog an mga sangribong colporteur. Duminakol nanggad sinda! Sinabi kan Bulletina na “haros dai mapaniwalaan” na natriple an bilang kan mga payunir puon 1927 sagkod 1929.

Sa pagtatapos kan 1929, nagkakrisis sa ekonomiya. Kan Black Tuesday—Oktubre 29, 1929—biglang buminagsak an halaga kan stocks sa New York Stock Exchange na nagresulta sa Great Depression sa bilog na kinaban. Rinibong bangko an nabangkarote. Nagpundo an operasyon kan darakulang negosyong pang-agrikultura. Nagsera an darakulang pabrika. Minilyon an nawaran nin trabaho. Kan 1933, uminabot sa pinakahalangkaw na 1,000 harong kada aldaw an naiimbargo sa Estados Unidos.

Paano makakayanan kan bilog na panahon na mga parahulit an siring na krisis? An sarong paagi iyo an awtong harong. Huling daing arkila asin buhis, an awtong harong o trailer nakatabang sa dakul na payunir na makapagpadagos sa ministeryo na dikit sana an gastos.b Asin kun kumbensiyon, an mobile home nagigin garo hotel na daing bayad. Kan 1934, nagtao an Bulletin nin detalyadong plano para sa sadit pero komportableng madadagusan na may importanteng mga bagay arog baga kan suplay nin tubig, lutuan, turutindog na higdaan, asin insulasyon para sa lipot.

Pinunan kan mapamaaging mga parahulit sa bilog na kinaban an paggibo nin awtong harong. “Daing aram si Noe sa paggibo nin arka,” an sabi ni Victor Blackwell, “asin ako dai man nin aram o eksperyensiya sa paggibo nin harong na trailer.” Pero nagibo niya iyan.

Si Avery asin Lovenia Bristow igwa nin awtong harong. Sabi ni Avery, “Garo ako baoo—pirming dara-dara an harong ko.” Sinda nagpayunir kaiba ni Harvey asin Anne Conrow, na an lanob kan mobile home may papel na de alkitran. May nararakdag na mga pidaso nin papel pag nagbabalyo sinda sa ibang lugar. “Dai pang nakahiling nin trailer na arog kaiyan kaidto,” an sabi ni Avery, “asin puon kaidto dai nang nakahiling nin arog kaiyan!” Pero sinabi ni Avery na an mag-agom na Conrow asin an duwa nindang aking lalaki an “pinakamaugmang pamilya na nahiling mi kasuarin man.” Nagsurat si Harvey Conrow, “Nungka kaming nagkulang nin ano man, asin lubos kaming tiwasay sa paglilingkod ki Jehova asin sa mamumuton na pag-ataman niya.” Pag-abot nin panahon, nag-adal an pamilyang Conrow sa Gilead School asin nagin mga misyonero sa Peru.

An mag-agom na Battainos nagpayunir man. Kan maaraman ni Giusto asin Vincenza na magkakaaki na sinda, ginibo nindang harong an saindang trak na 1929 Model A Ford, na nagin “siring sa hotel na mas magayon” kun ikukumparar sa mga tolda na dati nindang inistaran. Kaiba an sadit pa nindang aking babayi, nagpadagos sinda sa asignasyon na gustuhon ninda, an paghuhulit sa mga Italiano sa Estados Unidos.

Dakul an naghinanyog sa maugmang bareta, pero an mga dukha asin daing trabaho bihirang makakontribwir nin kuwarta para sa mga literatura sa Bibliya. Imbes, ibinabarter ninda an ano man na bagay para diyan. May duwang payunir na nakapaglista nin 64 bagay na itinao sa sainda nin mga interesado. An listahan “garo imbentaryo nin tindahan sa baryo.”

Nakaulay ni Fred Anderson an sarong parauma na gustong magkaigwa nin sarong set kan mga libro ta asin ibinarter kaini an dating antipara kan ina niya. Sa sunod na uma, sarong lalaki an nagin interesado sa literatura ta pero nagsabi siya, “Dai ako makabasa ta dai ako nin antipara.” Minsan siring, kan isulot niya an antipara kan saiyang kataid, nababasa na niya nin malinaw an mga libro kaya maugma siyang nagkontribwir para diyan asin sa antipara.

Si Herbert Abbott may urualsang lauman nin manok sa saiyang awto. Pagkatapos na makibarter para sa tulo o apat na manok, ipinapabakal niya iyan sa saudan, dangan nagpapagasolina. “May panahon daw na haros dai na kaming kuwarta? Iyo,” an isinurat niya, “pero dai iyan nakapapundo samo. Basta may gasolina, nagpapadagos kami, na nagtitiwala asin nananarig ki Jehova.”

An pagsarig ki Jehova asin makusog na determinasyon an nakatabang sa mga lingkod niya sa masakit na panahon na idto. Kan may bagyong mauranon, si Maxwell asin Emmy Lewis nakaluwas tulos sa trailer ninda bago pa iyan mabagsakan nin kahoy. “An mga bagay na ini bakong ulang,” an isinurat ni Maxwell, “mga pangyayari sana, kaya dai mi lamang naisip na sumuko. Dakul pang dapat gibuhon, asin gusto ming magibo iyan.” Makusog an buot ninda asin sa tabang kan mamumuton na mga katuod, hinirahay ninda an trailer.

Sa masakit na panahon ta ngunyan, minilyon na maigot na Saksi an may siring na mapagsakripisyong espiritu. Iyo, arog kan inot na mga payunir na idto, determinado kitang padagos na maghulit sagkod na sabihon ni Jehova na tapos na an gibuhon.